Vawiin khan Pu Lalrinmawia Ralte, Minister, Environment Forest & Climate Change, Labour Employment, Industrial Training, etc Bialtu MLA chuan Hachhek Constituency chhunga khaw hrang hrang tana MLA Cup Football Tournament vawi 3 Borai Playground a neih chu khuallian niin a hawng.

Pu Lalrinmawia Ralte chuan bialchhunga khaw hrang hrang thalaite tana Football inelna buatsaih thei a ni chu lawmawm a tih thu sawiin kum tam tak kalta 1970 chho vel atang tawh khan bial chhung khuate chuan Football chu an lo tuipui em em tawh a, Football Players tha tak tak an lo chhuak tawh a ni a ti a, tunlai thangthar zawkte tana inelna buatsaih thei a ni chu lawmawm a tihzia sawiin, bial chhung mipui ten hlut a, team 27 lai mai an tel thei chu a lawmawm hle a ni a ti bawk.Infiamna hi eizawnna thianghlim leh tha, taksa leh rilru hrisel neihna anih vangin chhel taka bei zel turin Constituency chhunga Football khel turte chu a chah a ni.

Bialtu Minister chuan tun hnaia bialchhung atanga thalai Germany a Football training tur mi 3 lai an kal thei chu chhuanawm a tih thu leh thalai dangte pawhin hei hi chona a ngaia, infiamna hmanga bial chhung leh Mizoram pum huap pawha lang thei tura taima taka tan la zel turin a chah bawk.

Hachhek Constituency MLA Cup vawi 3 hawnna hun hi Pu J.Malsawma, Vice Chairman Organising Committe chuan kaihhruaiin 1st Division ah team 16 leh 2nd Division ah team 11 telin an vaiin team 27 an tel an ni. He MLA Cup khel tur hian player constituency huam chhung a mite tan chauh tel phal a ni.

Minister hi Pu B. Lalchhawntluanga, SDO(civil) Kawrthah, Pu Lalduhthlana DFO Kawrthah, Pu Lalthakima PS leh khaw hrang hranga Village Council hruaitute?n an tawiawm a ni.