Vawiin hian Home Minister Pu R. Lalzirliana chuan Chhingchhip Mualpui Playground a January ni 11 atanga khelh tan tawh Joseph Thangbuta & Genevieve Roziki Memorial Football Tournament kharna inkhawmah khuallian niin a telpuia, Final Match a enpui bakah lawmman a sem sak nghal bawk.

Tournament kharna inkhawm tawi, Final Match khelh hma lawka Playground-a neih ah Pu R. Lalzirliana chuan, Pu John Siamkunga, MLA leh Mizoram Law Commission Chairman ni bawkte unau tangrualin an nu leh pa boral tawhte hriatreng nana hetiang Tournament an buatsaih chu lawmawm a tih thu sawiin, nu leh pa chawimawi thiam tak nia a hriat thu a sawi a. An chawimawina te chu Mizo thalai, Football a tui mite tana kawng hawn sakna a lo ni leh zel bawk nen, he Tournament hi a hlu hle a ni, a ti. Infiammi kal khawm te leh a en tura mipuite chu an theih ang tawka nu leh pa chawimawi tur leh an thu awih tlat tura chahin, chutiang mi chu Pathian lawm zawng mi an nia a hriat thute, malsawmna hnar a nih dante a ma tawn hriat tawhte atangin a sawi lang a ni. Home Minister chuan, Mizorama chu Pathian malsawmna avanga ram thangchak leh changkang chak tak kan nia a hriat thu sawiin, ram mipuiten Pathian hre reng chunga kan nun kan vawn zel chuan malsawmna tam zawk a lo kal zel a rin thu a sawi a ni.

A hawnna inkhawm hi Tournament Organising Committee Chairman Pu Varnghinglova’n a kaihruaia, Tournament buatsaihtu chhungkaw aiawhin Pu John Siamkunga, MLA leh Law Commission Chairman ni bawkin thu a sawi bawk.

Inkhawm tawi neih hnu hian Final Match hi Khawlailung FC leh Thingsulthliah FC ten an khel a, hun pangaiah inhneh tawkin, hun pek belhah an inhneh tawk leh a, Penalty hmanga chak zawk zawn chhunzawm niin Thingsulthliah FC hian 7-6 in hnehna an chang ta a ni. Lawmman semna neih nghal niin khuallian hian Lawmman te hi a hlan  ani.

Joseph Thangbuta & Genevieve Roziki Memorial Football Tournament hi Running Trophy niin kum 2015 atanga neih tan a ni a, kuminah hian January ni 11 atanga tan niin, Senior Team 23 leh Junior Team (under 14) 4 ten inelna hi an hmachhawn a, Player inlan zawng zawng hi 550 an tling a ni. Lawmman pakhatna hian pawisa fai Rs 30000 leh Trophy, pahnihna in Rs 15000 leh Trophy, pathumna in Rs 5000 leh Trophy bakah palina in Rs 1000 te an dawng a, mimal chawimawina engemawzat sem chhuah a ni bawk.

Home Minister hi bialtu MLA Er. Lalrinawma’n a rawn tawiawm a, buatsaihtu chhungkaw aiawha Pu John Siamkunga, MLA leh Law Commission Chairman ni bawkin a rawn telpui bakah Serchhip SP PU Lalringdika leh District Official pawimawh dangten an tawiawm a ni.

Attachment

  • Loading attachment...