Kar kalta Zirtawpni (6.9.2013) khan Agriculture Department (Research & Education) chuan Agriculture Conference Hall-ah Pu Lalram Thanga, Principal Secretary kaihhruainain Half Yearly Review Meeting an nei. He meeting hi Pu H.Liansailova, Agriculture Minister leh Pu K.S.Thanga, Parliamentary Secretary ten an ho a ni.
He review meeting ah hian Directorate, KVK 7 leh ITC atangin Agriculture Scientist 80 chuang zet kal khawmte chuan Mizoram leilung behchhana an zir chianna atanga hlawhtlinna an neih tawh leh an hmalak kal mek te mipui chhawr tangkai theih tura tarlanna leh sawihona hun an hmang a ni. Thlai/Thei chin tur tha leh hlawk, tui bawk si te, ran chi tha vulh turte, sangha thar hlawk dante, natna leh sik leh sa laka venhim dan bakah eitur sawngbawl leh vawn that dante leh ei leh bara Mizoram a intodelh theihna tura mithiam chherchhuah nana an hmalak dante chipchiar takin zirhona an nei a ni. Heng zingah hian buh chi tha Aizawng, Tamphaphou, Piolee, Sampada, RCM-7,10,11, Strawberry - chi tha Sweet Charlie, Vaimim- HQPM (High Quality Protein Maize), Ar - Giriraja, Vanaraja, Motor chana - Arkel variety etc. bakah thil dang tamtak Mizoram mipuite hman tangkai theih turin thiamthil pekchhuah tlak te an tarlang bawk a ni.
Khuallian Pu H.Liansailova, Agriculture Minister chuan Agriculture Department mithiamte chu a rin tawk thu sawiin tunhma chuan Agriculture Department hi Thilsem Department’ tia hnat a ni thin a, tunah erawhchuan, Department a thawktute thawhrimna a van gin Ei leh bara intodelhna atan a pawimawh ber ieh ram economy in nghahna lungphum a nihzia mipui ten an hre tawh niin a sawi. A thlawna thil dawn tumna thinlung “Subsidy syndrome” mipuiten an lo neih thin pawh tunah chuan a bo tan tawh niin a sawi bawk. Research behchhan nilo, mi vengva deuh thurawn hmanga tunhma a department hmalakna lo kalpui thin chu a fuh tawk lo ni a sawiin, research hmang ngei hian a siamthat theih a beisei tlat thu a sawi a, khawtinte thlai chin bik neia kal (one crop one village) a hun tawh hie a a hriat thu a sawi bawk.
