3091/2023-2024

Thla a lo sik a, khua a vawt a, mi hrisel pangngai pawh kan hritlang sup sup a, a la na zual deuh phei chu krismas leh kumthar hman nuam lo rawih khawpin an pik leh ngei ang. Khaw vawt leh hritlang hi a inzawm tlat em aw tih hi ngaihtuah tham a awm. Khawthlang lam unaute phei chu vur sur chum chum khawpin an chenna a vawt a ni a, an nipui lai ve pawh kan thlasik ang vela lum tawkte pawh a ni chauh a, an hritlang ve sup sup lem lo. Khaw vawt nena inkaihhnawih ni ngawt se Mizote aia hritlang nasa tur an ni. Boruak a bawlhhlawh avanga hritlang kan ni a, khaw vawh laiin boruak bawlhhlawh a zual avangin hritlan a awl a ni zawk. Hritlang kan tam dan atang hian kan boruak hipte hi a thianghlim tawk lo tih a hriat theih. Chutih laia boruak tibawlhhlawh lehzual tura halpuah kan han hal vak mai thin hi chu aw...a dawn tawi thlak deuh e.

Halpuah chu eng nge?
Halpuah kan tih hi China-ho tihchhuah a ni a, BC 206 - AD 220 inkar vela an tihchhuah ni a hriat a ni. A puak hrim hrim hi an lawm avanga siam an ni lo a, thlarau sual hnawh bo nana an siam a ni a, “Bian Pao” an ti. A tir takah chuan mau hring meia an rawh hian a puak pawp thin a, chu chu ran leh ramsate khan an hlauh theih em avangin thlarau sual pawhin a hlau ngei dawnin an ring a, hun pui bikah chuan thlarau sual hnawh bo nan mau hring an rawh ta fo thin a ni. Chuta tang chuan halphuah hi an lo siam chhuak ta a ni. A hnu deuhah chuan thlarau sual hnawh bona atan mai ni loin hlimna leh hmuingilna atana tawngtaina angah an hmang zui ta nghe nghe. Hun pawimawh bik chhinchhiahna atan an hmang chhunzawm ta zel a, naupiang te, thihna te, inneih te, inchawimawina ni leh kumthar lawm nante an hmang ta zel a ni. Khawthlang lamah a darh zel a, tunah chuan khawvel pumin an uar ta hle. A hmuchhuaktu an ni bawk a, China hi tun thleng hian halpuah siamchhuak nasa ber an la ni reng.

Eng nge a sualna ?
Sualna a nei lo. That lohna a nei. Halpuah leh halmawi lam chi reng rengah hian tur hlauhawm tak tak a tam hle. A mawina maiah hian tawp se pawi lek lo tur hi a ni a, mahse a mawina hian meikhu hlauhawm tak a keng tel a ni tih hi kan ngaihthah deuh thin. Natna chi hrang hrang- lung lam that lohna, thawhah, thawkna lam fel lo, hrawk dawt za (Bronchitis), thawkna dawt kaw tawt, laryngitis, emphysema, pneumonia leh thil dang dang a thlen nasa hle thin tih finfiah a ni.

Halpuah hi a siamphung a dang thluah a, tur hlauhawm an pai pawh a inang lo fur mai. Sulphur, manganese, cadmium, lead, zinc, sodium, magnesium, potassium leh beryllium-te hi a lar zual a ni. Hengte hi mihring taksaah tlem te bak awm phal a ni lo a, taksa zawh tawk bak a awm vaih chuan tur hlauhawm tak a ni. A tir ah chuan serthlum rawng leh a var bak an siamthiam lo a, tunah chuan rawng chi hrang hrang an siam thiam ta. Rawng chi hrang siamtura tur an hmante chu strontium (a sen), barium (a hring), copper (a pawl) leh sodium (a eng) te a ni a, chlorine dip an telh bawk thin. A puah awlsam nan Potassium Chlorate an hmang bawk. Hengte hi mihring hip atan chuan tur an ni vek.

India rama halpuahahte hian Toxic Link an tih pawlte chuan tur hlauhawm tak oxide chi hrang hrang, lead, cadmium, sulphur, phosphorous, nitrogen leh carbon-te a tam hle a ni tih an sawi a. Heng turte hi tui hnawng nena a inchiah chuan acid hlauhawm a siam chhuak thei vek a ni.Kanhip luha hrawk hnawnga a inchiah chuan acid chu a lo insiam ta a, chu chu taksa bung hrang hrang, a bikin hnar, hrawk leh chuap tan a pawi thei hle a ni. Hetiangin,

Halpuah hal runpui lai hun hian hetiang natna chi hrang hrang hi zaa 35 zetin a pung thin a ni tiin Toxic Link chuan an finfiah.

A ri bengchheng hrim hrim hian beng a tichhet thei a, BP sang a thlen a, lungphu chawl leh mut theih lohna a thlen bawk thin.

Hnam fing zawkte pawhin an hal tho si a ?

Chuti khawpa hlauhawm chu engati nge hnam fing zawkte hian an hal tho si ? Hnam fing zawk kan tih te hian an fin zawk ang bawk hian hriselna atan a tha lo a ni tih hi keini aiin an pawm hmasa zawk a sin! Chuvang chuan dan fel tak neiin an hal thin. Halpuah nazawng hal an phal lo a, sawrkarin siamchhuah a phal chin chauh an siamchhuak a, hriselna tichhe lo thei ang ber tura siam chauh an hal thin.

Europe-ah chuan ring lutuk chi khap vek a ni a, naupangin an leiin an hal thiang lo. UK-ah chuan kum 18 hnuai lam tan halpuah lei awih a ni lo a, kumthar zanah chuan zan dar 11 leh zing dar 7 inkarah chauh hal an phal thung. Western Europe-ah chuan kumthar hma karkhat a la awmin an hralh chhuak chauh thin a, kumthar zanah bak hal an phal lo. A duh nazawngin an hal ai chuan tiin a halna hmun bik siamin kum thar tirh minute rei lote chhung chauh an hal a, an duhtawk mai.

America ram ah chuan Consumer Product Safety Commission chuan halpuahsiamchhuah turte chu standard fel tak an siama, US Customs nen khauh takin dan an kengkawh thin. Ram dang atanga dan loa lo lutte leh ram chhunga himna lam ngaihtuah lo leka ansiamthinte chu an man hmiah hmiah thin. Chutianga dan loa kawl nia an hriatte chu an in pawh an dap chamchi thin a ni. State tinin dan hran khauh zawk ansiamthei theuh bawk. Delaware, Massachusetts, New Jersey, New York, and Rhode Islandstate-ah te chuan halpuah hal leh hralh a khapin an khap bur a ni. Las Vegas-ah chuan puak thei chi an phal lo a, a eng chi chauh an phal thung, chu pawh July 4 atan chauh phal a ni. Hun bika halpuah hal duh tan mimala hal awih a ni lo a, pawlho chauhin phalna an la thei a, kang thelh pawl hnena lak tur a ni. Phalna an neih hnuah pawh mi thiam bik ruahmanna leh kang thelh pawl awm lai chauha hal theih a ni.

New Zealand-ah chuan kum 14 hnuai lam hnenah hralh awih a ni lo a, midang pawhin Guy Fawkes Night an tih hun chhung chauhin an lei thei a ni. (Kum 1605 khan Guy Fawkes leh a thiante'n silaizen barrel 36 zet hmangin UK Parliament hal darh an tum a, November 5 zanah an man hlauh a. Hemi zan hi Guy Fawkes Night an ti ta a. Halpuah leh puak thei lam chi halin Guy Fawkes-a lim an hal thin.) Hal hunbi an nei lo thung.

Canada-ah chuan uluk takin an enfiah reng a, an ngai pawimawh hle. A hman dan, a siam dan, a zawrh dan zawng zawng hi Explosive Regulatory Division-in an en fel vek a ni.

India ramah chuan halpuah chungchangah Supreme Court hial a inrawlh a, State sawrkar zawng zawngin a that lohzia inzirtirna an kalpui vek tur a ni, a ti ta rup mai. Tin, hal theih tur chin a bithliah a, halna hmun atanga metre 4-a hlaa teha dB 125 aia ring chu hal phal a ni lo. Chu chu motor ke puak pawp rin zawng ang vel hi a ni ang. Tin, zan reia hal a phal lo a, zan dar 10 leh zing dar 6 inkar chu mutna hun, bengchheng siam awih loh hun a nih avangin hal a phal lo. Kum thar zanah thlah dul a awm chuang lo. Mizoramah chuan zanlai chu kan hal duh hun lai ber a ni a, dan kan bawhchhia tihna a ni. State sawrkar-in hal a khap te hi a mawi a, ram hmangaih zia a ni. Chuti chunga la hal lui talh te hi kristian tha tak nia kan ngaihte pawh an awm nawk nia! Kristian tha tak awm khawmna ramah hian dan bawhchhe chungin vanram kai kan tum theuh chu a ni awm e!

Tlangkawmna

Halpuah hi a puak dur a, rawng mawi tak a chhuah bak hi a thatna sawi tur a vang hle. A hlimawm hranpa ve e tih lohah chuan mihring leh environment tan chhiatna hlir a thlen a, mi tam takin natna vei phahin thawhah leh awm lam that lohna vei sa thenkhatte phei chuan an thih phah fo bawk. Thil puak dur satliah lawma mahni hriselna hralh hi phal chi em ni dawn? Ka pu vawm vawma tui, i in ngam leh in la, i dawt ngam leh dawt rawh an tih ai maha tha lo kha a ni a, van ek khum tum aiin a pawi zawk. A haltuin a tuar mai lo a, midangin an chhiat phah tel ve tlat hi a pawi zualna a ni. Harsatna thlentu lianpui a nih avangin insum hram hram ila kan that tlanna tur zawk a ni e.