No.2586/2021-2022
Aizawl 13th October, 2021 : Vawiin khan I&PR Director Pi Lallianpuii, MIS hovin a pisa ah I&PR officer te leh Mizoram Journalist Association Office Bearers’ ten sawrkarin humpui vuakveta halpuah, halmawi, silailem mu nei chi leh sky lantern a khap tura mipuite zirtir dan tur leh khap a hlawhtlin theihna tura hmalakna pawimawhte an sawiho a, MJA hi an President Pu Zonunsanga Khiangte-in a ho a ni.

Meeting kaihruaitu I&PR Director Pi Lallianpuii chuan sawrkarin hmalakna thar a neih changa mipuite zirtirna leh hrilfiahna kawnga MJA ten sawrkar tha taka an thawhhopui thinnaah lawmthu sawiin, mipuite hmakhaw ngai tak chunga theihtawp an chhuah thin hi a lawmawm a ni, a ti a. Thawhhona tha kan neih chhunzawm zel pawh a tul a, khawvel thang zelah mipuiten information an dawn theihna hmanrua (platform) zawng zawng hi kan luhchilh ve zel a ngai a, keimahni pawh kan inzir thar reng a tul hle a ni, a ti a. Sawrkarin kumtin halpuah leh halmawi khapna a tichhuak thin a, kan zawm tha tawk lo emaw ni chu aw tih tur hian thil a awm thin a, tunah pawh hian nasa lehzuala tan kan lak a ngai a ni, a ti.

MJA President Pu Zonunsanga Khiangte pawhin sawrkarin an chungah rinna a nghat thin chu lawmawm a tih thu sawiin, mipuite tana tha tur leh an himna tur zirtirna kawngah chuan theihtawp chhuahin tan an la ve reng dawn a ni tih a sawi bawk.

Vawiinah hian hmalak dan tur tha chi hrang hrang sawiho a ni a, chung zingah chuan supply awm lo tura a rang thei ang bera tun atanga chetlak a tul thu leh ramri luhka pawimawhah lirthei lo lut reng reng uluk taka check leh bazar a zawrh a awm leh awm loh check tura police hotute hnena ngenna siam te, MIMA hotute hnenah an memberte zingah hetiang sawrkarin a khap thilte hi Mizorama la lut lo tura hma la tura ngente, kum hmasa lama he khapna bawhchhia sawrkarin a mante hrem an nih dan puanzarte a tul thu sawi niin, hremna hi a na tawk lo nge dan kenkawh that a ni lo zawk tihte pawh zirchian a tula hriat a ni bawk a, sawrkarin kumtin khapna thupek a chhuah thin chungin tunhma lama tha taka zawm a nih hnuah tunhnai kum tlemte kal ta atang khan kan zawm tha ta lo nia lang hi hmalakna kawngah tan thar a ngai hle tih sawi a ni bawk.

Heng bakah hian kumtin halpuah leh halmawi halna hmun hi veng tinah a tam ngai lova, Police lamin mobile team te siam a, hetiang hal a nihna hmun hi rang taka pan vat thin a that thu sawi a ni a, chanchinbu, TV leh radio kaltlangin halpuah leh halmawi ten kawng hrang hranga hringmite harsatna a thlen dan uar lehzuala puan te, editorial leh article hmanga nasa lehzual a zirtirna pekte a tha tih a ni a, Delhi sawrkar pawhin kumin July thla khan halpuah leh halmawi khapna thupek a chhuah tawh thute pawh tarlan a ni bawk a ni.