No.3302/2021-2022

Aizawl, the 7th December 2021: Halpuah chungchangah Mizoram State Pollution Control Board chuan mipui ten kan hriattlan a, kan zawm ngei tur a hnuaia tarlan ang hian ngenna leh hriattirna a ti chhuak a. Kan kutpui Chrismas leh Kumthar vuakvetah coruak muanawm tak kan neih theihna tur te, mipui kan him tlanna atan leh kan chhevel boruak a lo thianghlim theih nan he thuchhuah hi zawm vek turin mitinte ngen kan ni.

Halpuah hal hian kan hriselna leh chhehvel boruak tan nghawng tha lo tak a neih avangin Supreme Court of India chuan halpuah hal chungchangah thupek a lo chhuah tawh thin a, heng a thupekte hi nemnghetin kum 2021 October ni 29 khan thupek a chhuah nawn leh a, mipuite leh thuneitute'n ngai pawimawha zawm ngei turin a hriat nawntir kan ni.

1. Halpuah hralh phalna licence nei chauhin halpuah a zuar chhuak (sale) thei ang.
2. Halpuah leh halmawi lam chi reng reng, chemical hlauhawm nep zawk hmanga siam (Green crackers) chauh hralh leh hman phal a ni.
3. Chemical hlauhawm heng antimony, lithium, mercury, arsenic leh lead hmanga halphuah siam chhuah hi khap tlat a ni. Heng bakah hian halpuah siamnaah strontium hman pawh khap tlat a ni bawk.
4. Halpuah siamna-a Barium Salt hman pawh phal a ni lo.
5. Halpuah/halmawi inzawm chi (joined firecrackers/series crackers) siam chhuah, zawrh chhuah leh hman khap tlat a ni.
6. Heng a thupekte kalha danin a phal loh halphuah siam chhuak, hralh, kawl leh hmang an awm a nih chuan Supreme Court chuan a ngai thu tak hle dawn a, sawrkar leh thuneitu lam pawh a thupekte ngun taka lo bawhzuia dan pela chete lo enzuia a tul anga hremna lek kawh turin thupek a chhuah bawk a ni.

Halpuah hal hian boruak a tibawlhhlawh a, mihring hriselna lamah nghawng tha lo tak neiin heng chuap (lungs), mit (eye) leh beng (ears) te hi a khawih pawi thei hle a ni. Halpuah ri bengchheng hian mipuiah chi-aina a thlenin dam lo leh tar chak lote tan harsatna a thlen nasa bik a ni. India danpui, Article 21-nain mitinte hriselna a humhalh tlat angin tumahin mi dangte hriselna khawih pawi zawnga an khawsak a remti lo a, a bikin kum upa lam, dawrawm zawk leh naupangte hriselna khawih pawi thei zawnga chet phei chu a rem lo lehzual.

Mizoram sawrkar pawhin halpuah hal khapna thupek chhuahin kumtin khauh takin a kengkawh thin a, CYMA pawhin Branch tin YMA huam chhungah duty-te insiamin halpuah hal lo turin theihtawpin hma an la thin bawk a, chuvangin halpuah hal pawizia hre thar lehin kan hma lawka hunpui lo thleng turah hian halpuah hal lo turin mipuite kan inchahin kan inngen a ni e.