3122/2022-2023

Aizawl, the 22nd December 2022: Mizoram Pollution Control Board chuan a hnuaia tarlan ang hian hriattirna chhuahin Mipuite hnenah ngenna a siam.

Halpuah hal hian kan hriselna leh chhehvel boruak tan nghawng tha lo tak a neih avangin Supreme Court of India chuan halpuah hal chungchangah thupek a lo chhuah tawh thin a, heng a thupekte hi nemnghetin kum 2021 October ni 29 khan thupek a chhuah nawn leh a, mipuite leh thunneitute’n ngai pawimawha zawm ngei turin a hriat nawntir a ni. Supreme Court thupek tlangpui chu -

Halpuah hralh phalna 'licence' nei chauhin halpuah a zuar chhuak (sale) thei ang.

Halpuah leh halmawi lam chi reng reng, chemical hlauhawm nep zawk hmanga siam (Green crackers) chauh hralh leh hman phal a ni.

Chemical hlauhawm heng antimony, lithium, mercury, arsenic, Barium salt,strontium leh lead hmanga halphuah siam chhuah hi khap tlat a ni.

Halpuah/halmawi inzawm chi (joinedfirecrackers/series crackers) siam chhuah, zawrh chhuah leh hman khap tlat a ni.

Supreme Court thupek aia khauh zawk mahin Mizoram sawrkar pawhin halpuah hal khapna thupek a chhuah a, a lawmawm hie.

Halpuah hal hian boruak a tibawlhhlawh a, mihring hriselna lamah nghawng tha lo tak neiin heng chuap (lungs), mit (eye) leh beng (ears)-\e hi a khawih pawi thei hie a ni. Halpuah ri bengchheng hian mipuiah chi-aina a thlenin dam lo leh tar chak lote tan harsatna a thlen nasa bik a ni. India danpui, Article 21-nain mi tinte hriselna a humhalh tlat angin tumahin mi dangte hriselna khawih pawi zawnga an khawsak a remti lo a, a bikin kum upa lam, dawrawm zawk leh naupangte hriselna khawih pawi thei zawnga chet phei chu a rem lo lehzual, chuvangin halpuah hal pawizia hre thar lehin kan hma lawka hunpui lo thleng turah hian halpuah hal lo turin mipuite kan inchahin kan inngen a ni e.