3123/2022-2023

Lunglei the 22nd December, 2022 – Lunglei District Task Force on Immunization chu vawiin chawhma khan an Chairman Lunglei Addl DC Pu Donny Lalruatsanga kaihhruaiin DC Conference Hall-ah meeting an nei.

Meeting-ah hian Lunglei District huamchhunga Routine Immunization achievement 2022-23 thlir ho niin vaccine thar pahnih nakum atanga pek chhuah tur atana ruahmanna siam tul te ngaihtuah ho a ni.

Dr Lalhlimpuii, Surveillance Medical Officer, WHO India chuan vaccination lama Lunglei District dinhmun, hmalakna tlangpui leh hmachhawpte sawizauna presentation a nei a ni.

Zenghri danna vaccine - Fractional doses of the inactivated poliovirus vaccine (fIPV) chu Lunglei District-ah nakum January thla atanga pek chhuah tum a ni a. Hemi bakah hian chhul hmawr cancer danna vaccine - Human papillomavirus vaccines (HPV) chu hmeichhe naupang kum 9 chung lam te hnenah pek chhuah tum a ni bawk.

Measles leh Rubella natna umbo turin India sawrkar chuan nasa taka hma la mekin kum 2023 chhunga umbo turin District tinah hmalak chhoh mek zel niin kumin April-December 2022 chhungin Lunglei District-ah Measles Rubella vaccine 1st dose mi 1432 hnenah pek chhuah tawh a ni a. Measles leh Rubella natna te darh leh darh loh uluk taka monitor reng a ni a. Kumin chhungin Khawsik sang leh vun thak (fever rash) nei mi 60 te sample chu WHO certified laboratory ah Measles-rubella natna an neih leh neihloh test tura thawn niin pakhat a positive thu report a ni. Measles Rubella vaccine 1st dose la tawh te tan 2nd dose chu naupang kum 5 a tlin hma thlenga lak theih anih thu tarlan bawk a ni.

Lunglei District huamchhunga vaccine la lo te house to house monitoring neih niin kuminah mi 460 tlawh chhhuah tawh an ni a. An zinga mi 184 (40%) chu vaccine pek chhuah laia awmlo leh zin chhuah vanga la lo an ni a; mi 123 chu vaccine chungchang awareness neih loh (awareness gap) vang niin; mi 92 (20%) chu chhan hrang hranga avang la duhlo (refusal) niin; mi 61 (13.3%) chu vaccine lak avanga damlohna (Adverse Events Following Immunization (AEFI)) hlauh avanga la lo an ni tih hmuhchhuah a ni.

Vaccine pek chhuah kawngah Lunglei District chu India ram puma High Priority District thlanchhuah te zingah a tel a. Lunglei District huamchhunga khawthlang lam (western belt) ah inkalpawhna te a harsat avang leh awmna hmun nghet nei lova pem kual thin an tam avangin hmalakna a ti chak lova. Fur ruahtui tlak tam laia hmalakna a kal chak zawk theihnan Department chuan lawng an mamawh a, hemi ti hlawhtling tur hian Lunglei DC hmalak puina an ngen tawh thu H&FW Department thawktute chuan an report a. Covid-19 hrilen laia CSR kaltlanga Ambulance an dawn te chu Immunization hmalaknaah tangkai taka hman chhunzawm zel an nih thu pawh report a ni. Immunization kawnga H&FW hmalaknaah School Education, Social Welfare, YMA leh tlawmngai pawl dangte leh kohhran hrang hrangte nena hmalak tlan thin anih thu report a ni bawk.