3207/2024-2025

Aizawl dated 26th November 2024: Vawiin khan Irrigation & Water Resources Department Auditorium, MINECO, Aizawlah ‘Sensitization cum Consultation Meeting on Thlai thar Market’ buatsaih a ni a. Dr. KC Lalmalsawmzauva, Adviser to Chief Minister (Implementation of Hand Holding Policy) & Co-Chairman, Mizoram Agricultural Marketing Board chu khuallian niin Dr. H. Saithantluanga, OSD to Minister, Agriculture & Farmers Welfare chuan hun a kaihruai a. MAMB Member leh Mizoram district hrang hrang atang a thlai thar lei tum, Buyer/Commission Agent an tel a ni.

Khuallian Dr. KC Lalmalsawmzauva, Adviser to Chief Minister chuan hmalakna hlawhtling tur a pawimawh hmasa ber chu rinawmna a nih thu sawiin taimakna leh rinawmna a kal kawp tlat chuan hlawhtlinna a thlen thuai thin thu a sawi a. Ram hmangaihna leh tihhmasawn duhna thinlung pu mite chu he Bana Kaih Scheme hlawhtlin nan hian an pawimawh tur thu leh kuthnathawktute dinhmun chawikan nan hian kan zavai a țanrual a pawimawh thu a tarlang a ni. Dr. KC Lalmalsawmzuava chuan Bana Kaih scheme thil tum zingah Mizoram leilung hausakna humhalh a tel thu sawiin kuthnathawktuten huan, lo nghet an neih theihna tur ngaihtuah tel a nih thu a sawi a. Thlai thar chhuahte man man zawk a hralh a nih theih nan thlai thar uluk tak a sawngbawl a pawimawh thu a sawi bawk a ni.

Adviser to Chief Minister chuan Sawrkar atanga a thlawn a thil beiseina hi hmasawnna tițhuanawptu a nih țhin avangin Bana Kaih Scheme hian a thlawn a sem thupui ah a hman ve loh thu a sawi a. Thlai thar lei tumte chuan chhinchhiahna felfai tak, a țul hun a enlet theih tur, enkawl țheuh turin leh hmasawnna thlen thei tur inelna thianghlim tak nei țheuh turin kalkhawmte a fuih bawk a ni.

He hun ah hian Pu Lalhmingmuana, Managing Director, Mizoram Agricultural Marketing Board chuan Sawhthing, Hmunphiah, Aieng leh Hmarchate lei leh hralh chungchang a Bana Kaih Scheme hnuai a ‘Price Support’ kalpui dan tur zirtirna a pe a. Sawrkar hriatpui ‘Auction Centre’ atang a thlai thar hralhte chauh hi ‘Support Price’ pek tur a nih thu a sawi a ni.