3206/2024-2025

Aizawl the 26th November, 2024 : Vawiin khan School Education Conference hall-ah hmeichhe naupang venhim leh zirtir chungchang inhrilhhriatna School Education Directorate Conference Hall-ah neih a ni a, School Education Minister Dr Vanlalthlana'n khuallian niin he hun hi a hmanpui.

Minister chuan he hunah hian thusawiin hmeichhia te hi khawtlang inrelbawlnaah an pawimawh a, kan khawsakna hmunah hmeichhe chunga hleilenna hi tih tawp a ngai a, hmeichhe chunga kutthlak hi a pa lo hle a ni a ti. Minister chuan hmeichhe chunga hleilenna tih tawp a nih theih nan District tinah hmalak a ngai a, he hmalakna hian mipa leh hmeichhe inthliarna leh in enhranna te, mihring zalenna chhuhsak te, dan laka enhranna te a huam vek a, naupangte chhan chhuak tur hian kan chet chhuah a ngai a ni a ti. Minister chuan November ni 25 atanga December ni 10 thlenga hman tur, '16 Days Awareness Campaign for Eliminating Gender- based Violence' chu khuh-hawnna a nei nghal.

He programme School Education Department leh Women & Child Development ten an buatsaih hi Pu Lalthantluanga Special Secretary School Education-in a kaihruai a, Pi Angela Zothanpuii Director School Education chuan mi thenkhatin hmeichhiate hi chawikan an ngai tawh lo an ti thin a, amaherawhchu POCSO case hi a la awm reng a, hei hian a lantir chu hmeichhiate hi chhanhim a, venhim an la ngai reng a ni a ti. Pi Zoramthangi Chhangte Director Women & Child Development chuan Mission Shakti chungchang a sawi a, hmeichhe humhalhna dan chi hrang hrang - In chhunga hmeichhiate chunga venhim te, hnathawhna hmuna mipat hmeichhiatna hman luihpui te, kum tling lova innei tur venna dan te siam a nih thu a sawi. Pi Zoramthangi chuan hmeichhiate chunga hleilenna a nasa a, chhungkuaa hmeichhe chunga kutthlak te a la tam a, kan ramah hmeichhiate him nan hmalak a la ngai nasa a ni a ti a, District hrang hranga Protection Officer te hian hmeichhiate chunga hleilenna chungchang hi an dawng nasa hle a ni a ti bawk.

He programme hawnna neih zawhah Technical session hman a ni a, Pi Laltanpuii Deputy Director Women & Child Development chuan hmeichhe venhim leh zirtir hna thawh dan leh an thawhpuite thawh ho dan tur a hrilhfiah a. Pu Zionparlawma Deputy State Project Director chuan Hmeichhe naupang enrollment leh drop-out rate chungchang a sawifiah a. Pu H. Laldinsanga, Sports Promotion Officer, Mizoram State Sports Council chuan hmeichhiate Sports lama hmasawnna an neih theihna tura School a sports pawimawh dan te a sawi a. Pu Zothanliana, Secretary, Science Teacher Association Mizoram chuan STEM Education leh hmeichhiate tih chungchang a sawi bawk.

He Programme-ah hian District Education Officers-te, Sub- Divisional Education Officers-te, Circle Education Officers-te leh Aizawl district a Primary atanga Higher Secondary  Principal leh Headmaster-te leh District Programme Officer-te leh Child Development Project Officer-te an kalkhawm a ni.