1661/2025-2026

Aizawl the 30th September, 2025: Vawiin chawhma dar 11:00 khan Mizoram Youth Commission Conference Room-ah, Mizoram Youth Commission-in Handholding Scheme hnuaia a kalpui tur MaidConnect Project chungchang sawihona meeting pawimawh tak neih a ni a, meeting hi Pu Malsawmzuala Ralte, Chairman MYC in a kaihruai a ni.

MaidConnect Project hnuaiah hian Mizo ṭhalaite, abikin mi ina awm/awmpui/nula te an awmna tur mumal taka zawnpui an ni ang a, an awmna turte nen pawh inremna mumal tak siam thin a ni ang. Training pek thin an ni ang a, hlawh chungchang pawh fel taka bituk a ni ang. Employees State Insurance Scheme/ESI ah ziah luh an ni ang a, an awmna ten hlawh an pek atangin percent tlemte an pek sak ang a, damloh nikhuaah pawh chumi hmang chuan an inenkawl thei dawn a ni. Tin, police verification tih tir an ni vek bawk ang a, hemi hmang hian harsatna leh buaina a awm thulhah pawh rang taka chhui chhuah theih a ni dawn a ni. Awmpui mamawh ten pawisa chawia zawn sak theite an dawr thin pawh Maid Connect hmang hian mumal taka khuahkhirh a ni ang.

Hei hi registration mumal tak nen a kalpui a, background check nen thlapa kalpui a ni dawn a ni.

MaidConnect project hi kumthar aṭanga felfai taka kalpui tum anih avangin vawiin meeting pawh hi koh a ni a. Hemi kaihhnawih a thil pawimawh hrang hrangte sawihona hun tha tak hman a ni. Project hi MYC in a kalpui hunah chuan MYC Office ah hian Officer kaihhruaina hnuaiah MaidConnect Cell din a ni dawn a. He Cell hian registration, verification, training te an lo buaipui dawn a ni.

Meeting ah hian Pi C. Laldinpuii, Chairperson, Mizoram State Commission for Women, Home Department, LESDE Department, Social Welfare Department, Women & Child Development Department official te, Pi Lalliani, President, MHIP Gen. Hqrs te leh MYC Official te an tel a ni.