2607/2026-2027

Aizawl dated 9th October 2026: Mizoram Sawrkar flagship Scheme - Bana Kaih Scheme kaltlang hian Chief Minister Special package hnuai ah tanpuina mi 7,275-te hnen ah pek chhuah tawh a ni a, Cheng 33,51,03,870 a tling tawh a ni. Bana Kaih Scheme Loan Component kaltlang hian Progress Partner tura thlan mi 522 te hnenah loan pekchhuah tawh a ni a, Cheng 48,79,10,824 a tling tawh a ni. Vawiin khan Handholding Scheme Phase III kalpui meka Implementing Department, District Administration leh Partner Bank-te tan, Planning & Programme Implementation Department Conference Hall, Aizawlah 'Workshop on Handholding Scheme' buatsaih a ni a. Dr. KC Lalmalsawmzauva, Adviser to Chief Minister (Implementation of Handholding Policy) chu khuallian niin, Pu Lalfakzuala, CEO, Handholding Scheme chuan hun a kaihruai a ni.

Dr.KC Lalmalsawmzauva, Adviser to Chief Minister chuan Sawrkar flagship Scheme Bana Kaih Scheme chu Mizoramin intodelhna kawng chak zawka a zawh theihna tura hmanraw tangkai a nih thu sawiin, kawng hrang hranga intodelhna tluantling siam tur chuan Bana Kaih Scheme Implementing department-a Nodal Officer-te an pawimawh tak zet thu a sawi a. Mi rintlak, Bana Kaih Scheme hmanga eizawnna ngelnghet nei tura thiamna leh theihna hmantlak neite chauh thlan chhuah a nih theih nan fimkhur tak leh uluk takin Nodal Officer-te chu hma la turin a chah.

Dr. KC Lalmalsawmzauva chuan mahni ram atanga kan thil thar chhuah chu ngaihhlut a pawimawh thu sawiin, Mizoram chhunga thar chhuah hmunphiahte chu ram chhung ah ngei tangkai taka hman uar zel a tul thu a sawi a. October ni 3 atanga ni 8 chhung khan Vairengte check gate paltlanga alu rawn lut zat chu Cheng nuai 115 man hu a nih thu sawiin, ei leh bara intodelh tura tan lak a tul thu a sawi.

Adviser to Chief Minister chuan Bana Kaih Scheme hlawhtlin lehzual nan Implementing department leh Bank-ten thawhhona tha an neih a pawimawh thu a sawi a. Implementing department-a thawktuten an department hnuaia Progress Partner thlan chhuahte chu an vil uluk a tul thu sawiin, hma la thate tan Chief Minister Special Award buatsaih a nih tur thu a sawi bawk a ni.

Vawiin Workshop ah hian Pu LP Lalchangkima, Member, Mizoram State Project Coordination Committee chuan 'Handholding Scheme' dilna endik dan tur leh Monitoring kalpui dan tur chungchang sawi zauna a nei a. Pu Zohmingthanga, Member, MSPCC chuan 'Banking & Project Appraisal' tih thupui hmangin, Bana Kaih Scheme loan dilna Detailed Project Report siam dan te, hma an lak dan tur enpui dan te leh Progress Partner rintlak thlang chhuak tura hriat tur pawimawh hrang hrang, Power point presentation hmangin a tarlang bawk a ni.

Chawhnu lamah hian Handholding Scheme kalpuina kawnga Bank leh Implementing department-te inher rem ngai leh siamthat ngai awmte ngaithlak a ni a. Phase i leh ii kalpui tawhna a harsatna awm te sawi lan niin, heng harsatna sutkian dan tur te sawi ho a ni bawk.

Bana Kaih Scheme hnuai ah hian Scheme 15 rin luh a ni a. He scheme hnuaia loan late hi Sawrkarin a pung a rulh sak thin a, Cheng Vbc 1.123 a rulh sak tawh a, Guarantor fee Cheng nuai 14 vel a pe tawh bawk a ni.