Handloom khawpuiah Thenzawl siam tum a ni. He thu hi August ni 12, 2014 a Parliamentary Secretary, Pu Joseph Lalhimpuia’n Industries Department hnuaia Thenzawl-a Handloom Complex a tlawhna a sawi a ni.
Pu Joseph Lalhimpuia chuan tualtah puan (Handloom) enkawltute chu an thil siam chhuah leh hna an thawhnaah hmasawn zawnga ngaihtuahna thar hmang thiam zel turin a chah a, an thawh rimnate leh hma nasa taka an lo lak tawhna te tha a tih thu a sawi. Sawrkarin handloom tih changtlunna turin hma a lak choh zel thu sawiin Sawrkar Laipui in cheng vaibelchhe 17, handloom cluster din nan hian a lo ruahman tawh a, hemi hnuaiah hian Thenzawlah pawh common facility centre hawn tura ruahmanna siam a ni, a ti. Heng centre hmang hian handloom lama hmasawnna mai bakah puantahtute tana hamthatna tam zawk siam a ni thei dawn a ni tiin Thenzawl hi Handloom Khawpui-a siam ngei a nih theih nan ngawrh taka hma lak a nih tur thu a sawi bawk.
Thenzawl ah hian Handloom Instructor 1978 kum khan dah a ni a. 1979 khan zirlai 6 lain bul tan a ni a, mi tam tak lo zir chhuak tawhin kumin pawh hian mi 93 training pek an ni. Thenzawl hi Mizo puan deh chhuah tamna ber khua a ni a. Tunah hian puantahna hmun unit 821 lai a awm a. Heng unit-te hian kumin January leh June chhung ringawt pawh khan puan 65,276 an tah chhuak a, heng puan tah man hi a vaiin cheng veibelchhe 11 chuang man nia chhut a ni.
Parliamentary Secretary chuan hemi ni vek hian ZOHANCO enkawl lai Thenzawl-a Common Facility Centre building a tlawh bawk.
Hemi hnu hian Food Testing Laboratory Building Thenzawla mi chu a tlawh leh a. He Food Testing Laboratory-a hman tur khawl te hi USA lam atanga chah mek a ni. Eitur him tawk leh him tawk loh enfiahna hmun tur a ni a, a building hi cheng nuai 300 vel senga sak a ni a, khawl chah nan hian cheng nuai 100 chuang sen belh tur a ni bawk. Parliamentary Secretary hi Trade & Commerce Department atangin Secretary leh Director-in Thenzawlah hian an tawiawm a ni.
Hemi ni vek hian Nuai 122 seng a sak tur Serchhip a DEO & SDEO office hmun tur a tlawh a. Serchhip hi Mizoram-ah literacy rate san berna District a nih avangin sawrkar pawhin a ngai pawimawh a, heng office te pawh hi sak thuai thei turin a sakna tur sum pawh tih fel a ni thawkhat tawh a ni.
