Vawiin chawhma dar 10.00 atang khan UD&PA chuan Kolasib-a Brig. C. Vankunga Shopping Center Conference hall-ah ni khat awh tur in Bawlhhlawh Sawngbawl Dan an zirho. He workshop-ah hian thupui then hrang hrang 5 hmangin Solid Waste chuan engchin nge a huam tih te; a sawngbawlna tha kan mamawh tawhzia thu te, changpat atanga leitha siam chungchang leh eizawnna tling a nihdan te, bawlhhlawh senghawina kawnga mawhphurhna insemdarh a tulzia leh tangkaina te mithiamten an zirtir a. Mahni kawmchar maia changpat hmanga leitha siamna bun theih a nihzia pawh a taka entir a ni bawk.

He hun hi Pu Zorammuana, Director, UD&PA chuan kaihruaiin, hun hawnna thu a a sawi a. UD&PA chuan Aizawl khawpui chauh ni lovin, Mizoram khawpui dang tam tak tan kan nitin bawlhhlawh sawngbawl dan hi ram changkang zawka mite tihdan anga kalpui tuma tanlak mek a nih thu a sawi. Khuallian Kolasib DC Pu Jitender Yadav pawhin, UD&PA hmalakna chu fakawm a tih thu sawiin, Kolasib district chhunga an hnathawhte chuan khawpui a cheimawi mai bakah, mipuite tan chhawr tur tam min buatsaih sak a ni a ti.