1562/2024-2025

Dated Aizawl: the 13th August, 2024: Vawiin chawhma dar 11 khan India ram zalenna champha vawi 78-na lawmna hmahruai, Art & Culture Dept. huaihawt, In tina Hnam Puanzar zar (Har Ghar Tiranga) pual Concert chu Art & Culture Dept. Secretary Pi Florence Zotluangpuii hovin Vanapa Hall, Aizawlah neih a ni a. Art & Culture Dept. hotute bakah, Zirlai thahnem takin he hun hi chhimin, zaithiam hrang hrangte nen zalen leh hlawkthlak taka hun hman a ni.

Pi Florence Zotluangpuii chuan thu sawiin, Har Ghar Tiranga chu India ram hun hlui thlir letna atana awmze thui tak nei a nih dante tar langin Hnam Puanzara rawng hrang hrang awmzia leh an entir theuhte a sawi fiah nghal a. Hei bakah hian he hun hman a nih chhan chu zalenna sualtute hniakhnung kan zui zel theih nante, ram leh hnam chawisanna a nih dan bakah, hmasawnna leh hun harsa kan lo paltlang tawh dante entirna a ni, a ti a. 'Har Ghar Tiranga' chu inpumkhatna, 'Unity in Diversity' lantirna pawimawh tak a nih dante a sawi bawk a ni. 

Hemi zawh hian, IMFA Music Wing (Art & Culture Dept. hnuaia music zirlai) te chuan National Song 'Van de ma Taram' an rem bakah Lalbiakhlui Pachuau in Mizo Folk Song a sa  bawk a. Hei bakah hian zaithiam hrang hrangte'n kal khawmte chu zaiin an awi bawk a. Pi Carol V.L.M.S. Dawngkimi, Director, Art & Culture Dept. chuan lawmthu sawiin hun hman hi a khar a ni.

"Har Ghar Tiranga" Concert hi thalaite thinlunga India ram zalennna hlutzia intuh thar nana buatsaih a ni a. Nimin lamah pawh, 'Har Ghar Tiranga Yatra' (Har Ghar Tiranga puala Kawngzawh) chu neih a lo ni tawh bawk a ni.