1561/2024-2025

Dated Serchhip, the 13^th August, 2024: Vawiin khan Serchhip District Task Force for Immunization chu an chairman Serchhip Bawrhsap Pu Paul L.Khuma kaihhruaiin Serchhip DC meeting hall ah an thukhawm.

Khawvela immunization beihpui lian ber Universal Immunization Programme (UIP) hnuaia India sawrkar hmalaknain vaccine hi natna inventheih chi 11 laka inven nan hunbi neiin pek chhuah thin a ni a. District tin te chu target siamsak an ni a, a hun bi ah Health Department ten vaccine an pe chhuak thin a ni. An hmalak dan viltu pawimawh tak District Task Force hi District tinah dah niin DC kaihhruaina hnuaiah department hrang hrang te leh a tul angin khawtlang hruaitute pawh thawkhoin District chhunga naupang zawng zawngin vaccine a hun taka an lak theih nan an tang tlang thin a ni.

Vawiin thutkhawmah hian kum 2023-2024 leh kumin sawrkar kum kal meka Serchhip District a immunization kalpui dan thlir letna neih a ni a. Kumin sawrkar kum kal mekah June thla thlengin 85.8% an tuam tawh a, kum kaltaah 69% an tuam a ni. Serchhip District chhung khaw hrang hrangah bituk (target) zat an tlin lo tih hmuhchhuah niin hei hi a chhan bul pui ber chu data entry tih dik loh vang te, kar tina thlirletna neih dan felfai tawk loh vang te, mipui mimirah puanzar nasat leh zual tul vang te niin meeting ah hian an sawi a ni.

DC chuan Health lam thuneituten an official kalchhuak te hnathawh dan fimkhur leh uluk takin kartin thlirletna neih ni se,  a theih chinah online hmangin whatsapp leh webinar te pawh nei thin turin a chah a. Thawktute tiphur turin a thawk tha te thlangchhuakin Award siam ni se, tiin meeting ah hian an rel a ni.