521/2023-2024

Aizawl, the 22nd May 2023: Tun hnai a Court in pawngsualtu hremna a pek chungchangah Social media-ah a tuartu naupang nihna chhuichhuah theihna tura thu thehdarh a nih thu leh Matric Exam result nghawng avanga Naupang kumtlinglo in a nunna a lak thu leh naupang hming leh khua Media ah tarlan a ni a, hetianga naupang harsatna tawkte nihna chhuichhuah theihna tura mipui vantlang hmaa thehdarh a ni ta mai hi Mizoram State Commission for Protection of Child Rights chuan pawi a ti hie a.

Harsatna tawk Naupangte emaw Dan nena inrem loa che Naupangte nihna mipui tana chhuichhuah theih tura an Hming , veng , khua , thlalak , Zirna In leh naupang nihna chhuichhuah theihna tura mipuite pui theitu dang tarlang tute chu Section 23 of The Prevention of Children From Sexual Offences Act, 2012, leh Section 74 of the Juvenile Justice Act, 2015 , hmanga hrem theih an ni a, hetianga ti an awm leh a nih chuan Mizoram State Commission for Protection of Child Rights chuan Dan angin hma a la dawn a ni. Mizoram State Commission for Protection of Child Rights chuan Naupangte Dikna Chanvo humhim kawngah Media mi leh sate bakah mipuite thawhho pui turin a sawm a ni.

Mizoram State Commission for Protection of Child Rights chuan Naupangte tana tha ber tur ngaihtuahin hma a la zel dawn a ni.