United Kingdom rama hmunpui nei, ‘Humanitarian Aid Relief Trust’ (HART) member pawimawh zual te chuan nimin tlai khan Chief Minister Pu Lal Thanhawla chu a chenna in McDonald Hill, Zarkawtah an kawm.

 

 

HART member 11 lokal te hi Baroness Cox, MP British Parliament, UK in a rawn ho a. He pawl thil tum ber chu India – Burma border chhehvela chengte hriselna endik a chawikan a ni a. Burma Chin state hmun thenkhat leh Saiha District chhunga khaw thlan bikah te vantlang hriselna lam zir chhoh a, mumal taka ruahmanna siam chhoh chu a tum lian zual a ni. Hemi atana survey te neih a, eng hri te nge leng thin tih hriatchhuahte a tul tur thu an hotunu hian a sawiin, a inven dan tur te pawh ruahmanna siam a ni ang a ti.

Saiha District chhunga khaw thlan bikte bakah Burma Chin state a Community Health Workers te tan health awareness programme leh training programmes te an siam sak bawk ang.

An memberte zingah hian Ben Roger, Human Rigths Committee Chairman bakah doctor, pastor, cinema siamtu, thlalatu, insurance company mi leh zirlaite an tel a ni.