Health Minister Pu Lalrinliana Sailo chuan vawiin khan Zampui tlangdunga Mizo khua te tlawhin tun hnaia Bungthuam tlangval Zarzokima thihna avanga rilru thlabara awm mek Mizote a thlamuan. Minister hian Vaisam, Hmawngchhuan, Hmunpui, Tlaksik leh Vanghmun khua te a tlawh a. Mipui pungkhawm hmaah thu sawiin Zampui tlangdung Mizo mipuite thlabarna chu sawrkarin a hria a, kan mi leh sa te chu khawi hmunah pawh awm se an harsatna chu kan harsatna a ni tih hi Mizoram sawrkar rilru a ni a ti. Minister chuan Tuikuk Mizoram mi dik tak Mizoram a cheng duhte chu thlamuang takin awm se sawrkar in a duh a, tuna Mizoram chhuahsan tate pawh lo kir leh se sawrkar chuan a duh bawk a, amaherawhchu, Tuikuk te zingah Mizoram a let duhlo harsatna siam an awm a nih chuan sawrkarin uluk takin an chungchang a ngaihtuah dawn a ni a ti. Bungthuam tlangval Zarzokima kaphlumtu misualte chu Tripura police te nena tangkawpin Mizoram police te chuan ngawrh takin an chhui zel a, heng misualte hi man chhuah lohin an awm dawn lo a ni, a ti a. Zampui tlangdung mipuite chu sawrkar hran hnuaia awm ni mahse Mizoram sawrkar chuan a ngaihthah lova ‘Thil ropui tak ken tur nei lo mah ila, kan thinlung kan rawn keng a ni,’ tiin mipuite chu a thlamuan a ni. Zampui tlangdung khaw hrang hrang a tlawhna ah hian Minister hian infiamna hmanraw chi hrang hrang football, volleyball, volleyball net te bakah thosilen leh silpauline thahnem tak khawtlang hruaitute hnenah a hlan a. MMU pawh Mamit atanga hruaiin damdawi thahnem tak a keng bawk a, Zampui tlangdung khua te bakah hian Tuikuk te chenna khaw thenkhat pawh tlawhin thil awm dan a enfiah bawk a ni.

Health Minister hian nimin khan Bru helpawl ni a inchhal ten an kahhlum Zarzokima nu leh pa Pu Lalngilneia leh Pi Angelvenpuii, Bungthuam te chu cheng nuai khat a hlan a, Bungthuam khaw mipuite hian police outpost an duhthu Minister hnenah hian an lo thlen a ni.

Tripura state chhunga Vanghmun khua ah riak turin Pu R.Romawia, Assembly Speaker pawh vawiin tlai khan a thleng a, Health Minister tlawh loh khua Mizo khua hrang hrang a thlamuan a ni.

Hetih lai hian khawthlang lamah boruak a muanawm a, Zampui tlangdunga Mizo mipuite pawh hian an chak lakna Kanchanpur chu la tlawh ngam chiah rih lo mah se boruak a tha chho zel tih an sawi.