Vawiin chawhnu ah khan ICT Conference Hall-ah School Education Minister Pu H.Rohluna chuan ICT leh School Education Department te tang dun in a buatsaih, mipui ten an hman theih tur clean Mizoram website, www.cleanmizoram.com chu a hmet hawng. He website ah hian hashtag ‘#’ hmangin social network lar pathum facebook, twitter leh instagram a account nei ten faina chungchanga hmalakna te khawvel pumpui hmuh ah an phochhuak thei dawn a ni.
Twitter emaw facebook leh instagram hmangtute chuan an status update na text/media box chhungah faina kaihhnawih thil a hmalakna thu emaw thlalak te thun lut(upload) hmasa in #cleanmizoram an type belh anga, chu chu www.cleanmizoram.com ah chawplehchilh in a lo awm nghal dawn a ni.
Clean Mizoram website hawngtu School Education Minister Pu H.Rohluna chuan Clean Mizoram Movement chu sawrkar hnathawk-te leh Education Department siam programme bil nilovin Zoram mipuite ta leh hmachhawp lian tak anih avangin a hlawhtlin ngei a ngai a. He movement hlawhtlinna atan hian Zoram mipui zawng zawng thukhat vua in kan tanho vek a ngai dawn a ni a ti a. Zoram mipuite thinlungah faina, thianghlimna leh invawnfai hlawkna a intuh phawt chuan faina in a ken tel hlawkna dang tam tak – hriselna, hmasawnna, thluak thatna, hmingthatna leh thil tha tam tak Mizoram mipuiten kan dawn tur thu a sawi bawk a ni.
Thusawitu dang Parliamentary Secretary Pu Joseph Lalhimpuia pawhin Faina chungchanga Mizoram sawrkar hmalakna hi kum hmasa lamah daih a in tan tawh thu sawiin Faina ngaipawimawh tak Prime Minister kan nei chhunzawm hi Mizoram tan phurna nasa tak leh faina kawnga kan hmalakna te a hlawhtlin theihnan a vanneihna a ni a ti. Kan bawlhhlawh khawl khawm leh hmun tawp lai te thianfai hmasa in fai leh thianghlim hlawkzia mipui thinlung ah kaih harh hmasak kan tum ang a. Mizoram a lo fai hun chuan ram hmelhmang mawi tak leh a aia boruak nuam zawk a awm lo tih hnamdang leh ramdang miten lo hria in an rawn pan dawn a ni a ti.
Clean Mizoram website hawnna programme hi Pu Lalhmachhuana, SPD, SSA in a kaihruai a. Pu C.Lalhmachuana, Secretary, ICT, School Education Director Pu H.Lalengmawia, Pi Malsawmthangi, Director, SCERT, NGO hruaitute leh zirlai pawl hruaitu te bakah Clean Mizoram Network hotute pawh he hunah hian an tel a ni.
