Nimin (3.11.2016) khan Haulawnga NIELIT Study Centre, NIELIT ten an buatsaih chu Social Welfare Minister leh bialtu MLA ni bawk Pu PC Lalthanliana chuan a hawng.

Pu PC Lalthanliana chuan computer zirna NIELIT Study Centre Haulawnga hawn a ni ta chu lawmawm a tih thu a sawi a. Sawrkar hna thawk tur chuan NIELIT emaw a tlukpui atanga computer thiamna a neih a tul tawh dawn avangin, CCC hmangin India ram hmun dangah pawh eizawn nan a hman tlak dawn a ni a ti. State capital lo ah chuan Darlawn leh Saitual te chauh in an la neih thu sawiin, Haulawng khua bakah a chhehvel khua te pawhin an chhawr tangkai a duh thu a sawi a ni.

UD&PA Minister Pu Zodintluanga pawhin khawvel changkang zelah information technology tel lo chuan hma a sawn theih tawh loh a, hetiang computer a thlawn a zirna mahni kawtkaia a rawn awm hi in lawm thiam hle a ngai a ni a ti a. Tunlai khawvelah technology-in min rûn a, smartphone buaipuiin mi tam tak chuan kan hnathawh leh hmasawnna tur pawh ngaihtuah lo in hun kan khawhral a, chutiang culture atanga kan chhuah a hun tawh tiin, zirlaite hnenah chuan nakin zela tangkaipui tur thiamna leh finna uar zawk turin a duh thu a sawi a ni.

NIELIT Deputy Director Pu C. Vanlalnunga chuan NIELIT Study Centre-a zirtirtu pahnih dah thuai an tum thu a sawi a, nikhatah shift 4 awm in, batch khatah zirlai 24 ten an zir theih tur thu a sawi. Exam pawh a tul dan anga Lungleia exam theih tura ruahhmanna siam a nih thu a sawi. Tun dinhmunah mi 80 velin dilna an thehluh tawh thu tarlan a ni.

Hawnna inkhawm hi Haulawng VCP Pu KH Tialthanga’n a kaihruai a, he NIELIT Study Centre hi Haulawng VC House cheithata hman a ni.

Attachment

  • Loading attachment...