Nimin (3.11.2016) khan Zokhuma Memorial Field-ah Haulawng Centenary lawmna neih a ni a, UD&PA Minister Pu Zodintluanga chu Khuallian niin, Social Welfare Minister leh bialtu MLA ni bawk Pu P.C. Lalthanliana chu Khualzahawm a ni.

Pu Zodintluanga chuan Haulawng kum 100 champhaphak lo thleng tura khawtlangin a lawm dan tur kum 2011 vel atang daih tawha ruahmanna bul an lo tan, a hlawhtlinna kan hmu ta mai chu lawmawm a tih thu a sawi a. Pawl tam takin an pawl hmalakna tihhlawhtlin nan sawrkarah tanpuina dil mai ching an awm laiin, Haulawng mipuiten Centenary lawm nan sawrkar pur lo a mahni insengso a hma an la chu lawmawm a tih thu a sawi a ni. Haulawng khua atangin lehkha thiam leh mi chhuanawm tam tak an lo chhuak tawh tiin, chutiang mi chu inelna sang tak karah an lo chhuah belh zel a duh thu zirlaite hnenah a chah a ni. Khuallian hian Pu TC Jonunsanga ziah ‘Hautlangpui Zaipute’ tih lehkhabu a tlangzarh nghal a ni.

Pu PC Lalthanliana chuan Haulawng Centenary nih kum leh Model Village-a puan nih kum chu thil inhmeh tak, vanneih thlak tak a ni, a ti a. Centenary lawmna ni a NIELIT ten computer zirna an rawn buatsaih chu lawmawm a tih thu a sawi a ni. Centenary lawmna chu thinlung taka hmang tlang a, Haulawng khaw chhuak in hre tawhlo intawhkhawmna ni a hmang tur leh in hmangaih tawna bul tan lehna ni a hmang turin a duh thu a sawi a ni. Khualzahawm hian Centenary Magazine ‘Hautlangpui Kum 100 (1916-2016)’ tih a tlangzarh ve thung a ni.

He inkhawmna hi Haulawng Centenary Organising Committee Chairman Pu R. Lalhmingliana’n a kaihruai a, Haulawng VCP Pu KH Tialthanga’n thutawi sawina hun a hmang a ni. Centenary lawmna puala volleyball competition buatsaih a titha te hnenah lawmman semna neih a ni a. Pu NG Taithianga, kum 90 leh Pi Chalchhuaki Ngente, kum 98 te hnenah Haulawnga damrei ber lawmpuina hlan an ni.

Inkhawmna neih zawh hian bialtu MLA Pu PC Lalthanliana chuan metre 500-a thui, Centenary Road hawnna a nei bawk a ni.