3786/2024-2025

Lunglei, 2025 Pawlkut thla ni 14: Vawiin khan Lunglei District Deputy Commissioner Office hma laknain District mipuite'n chiang zawka sawrkar hma lakna an hriat a, an chhawr ṭangkai theih nana an kawkaia kal chilhna "Prashasan Gaon Ki Ore" (I Kawtkaiah Sawrkar) campaign chu a ṭum khat nan Hausiampa Hall, Haulawngah buatsaih a ni.

Lunglei District Bawrhsap Pi Navneet Mann chuan Prashasan Gaon Ki Ore hnuaia Lunglei District-a sawrkar hma lakna hrang hrang inhrilhfiah nan leh awlsam zawka mipuiin sawrkar office an dawr theih nana department inchhawp chhuakte chu chhawr ṭangkai tum ṭheuh turin Haulawng mipuite chu chahin, "I Kawtkaiah Sawrkar" campaign kalpui tur chu a hawng nghal a ni.

He hun hi Lunglei District Additional Deputy Commissioner Pi Rochuangkimi Khenglawt chuan kaihruaiin, "I Kawtkaiah Sawrkar" tih hma lakna chu mipuiin khawpui pan kher ngai lova awlsam zawka sawrkar office hrang hrang an dawr theih nana ruahman a nih thu a sawi.

Vawiina Haulawnga Prashasan Gaon Ki Ore hun buatsaihah hian office hrang hrang - DC, Agriculture, Horticulture, Irrigation, BDO, AH & Vety, Social Welfare, DCSO, DEO, Industries leh Medical lam te'n stall hawngin, awlsam zawka mipuite dawr theih turin an inpho chhuak a. Electoral roll enfiah/inziah luh, Aadhaar siam ṭhat/siam thar, member belh/paih & ration card leh Aadhar link, bank account hawn thar leh sawrkar scheme hrang hranga inziah luh leh mipuiin harsatna an thlenna hun te buatsaih a ni.

I Kawtkaiah Sawrkar programme hi kalpui chhunzawm zel tur niin, a thawh khatna January 2025 chhunga kalpui turah khaw pali thlan a ni a. January ni 17-ah Ralvawngah, January ni 21-ah Bualteah leh January ni 31-ah Bunghmunah te buatsaih leh a ni ang.