No.3493/2021-2022

Aizawl, 22nd November, 2021 : Kumin November thla tir atanga Lunglei District-a hmalakna kalpui chhoh mek ‘MIPUI HNENAH KAL RAWH – GO TO THE PEOPLE’ Project chu vawiin khan ‘Good Governance Week 2021’ pualin Huaruang ah buatsaih a ni.

‘MIPUI HNENAH KAL RAWH – GO TO THE PEOPLE’ Project in a tum ber chu District mipui, a bik takin thingtlang khaw kilkhawr zawka cheng te sawrkar scheme hrang hrang te hrilh hriata, application thehluh tul te a hmuna tih fel pui saka, certificate siam sak te bakah an mamawh leh vei zawng hrang hrang sawrkar hnenah an thlen theihna hun siam sak a ni.

Vawiin program-ah hian Lunglei DC Pu Kulothungan A, SDO (S) Pi C. Lalduhzuali, SDC Pu Lalsanglura leh DC staff engemawzat kalin Huaruang Community Hall-ah mipuite tan Aadhaar enrollment thar leh siam that te, Tribal Certificate, Income Certificate leh Residential Certificate-te a mamawh tan an siam sak a ni. Hemi bakah hian sawrkar hnena mamawhte thlen duh tan hun siam sak an ni bawk.

Vawiin hawnna program SDO (S) Pi C. Lalduhzuali kaihhruaiah Lunglei DC Pu Kulothungan A chuan thu sawiin ‘MIPUI HNENAH KAL RAWH – GO TO THE PEOPLE’ Project chu Thenzawl SDO (C) anih laia a bultan anih thu leh Thenzawlah hian hlawhtling taka kalpui niin Lunglei District-ah pawh zau zawka kalpui zel a tum thu a sawi a. Inkalpawhna te a that tawkloh vang leh lirthei harsatna avang ten thingtlang a cheng tam tak te tan District capital tlawh a harsa tih kan hriatpui che u a ni tiin Lunglei DC chuanCovid-19 hrilengin zia lam a pan zel chuan nakum lamah Department hrang hrang – H&FW, AH&Vety, Forest, Agriculture, School Education, PHE, PWD, Horticulture, Fisheries etc-te leh Bank hrang hrang te nen tangkawpin mipui mamawhte an khua ngei thlen sak an nih tur thu a sawi a ni. He project ti hlawhtling tura DC office-a officer-te leh staff te thawhrimna leh inpekna avangin an chungah lawmthu sawiin tlawmngai pawl hrang hrang leh khawtlang hruaituten phur taka anlo tawiawm thin avangin lawmthu a sawi bawk a ni.

Hauruang VCP Pu Hrangzika leh YMA Fin secy Pu Remsangpuia te pawhin thu sawiin Hauruang khua mipuite hmakhua ngaia Lunglei DC Pu Kulothungan A leh a thawhpuiten program hlu tak, mipui tam tak ina an mamawh an rawn buatsaih avangin lawmthu an sawi a ni.