No.3492/2021-2022

Aizawl, 22nd November, 2021 : Kan hma lawka hunpui Krismas leh Kumthar lawmna turah mipuite him leh thlamuang taka an Bazar theihna turin Hnahthial khawpui chhung hmun lun laia Lirthei tlan phallohna siam chu tukin khan Bazar kawnah District Bawrhsap Pu R.Lalremsanga chuan hawngin "District khawpui kan ni tawh a, hmana kan tih dan kan tih reng chuan hma kan sawn thei lovang tih a hlauhawmin hma thar kan lak hi a tul a ni" a ti.

Hnahthial District Bawrhsawp Pu R.Lalremsanga chuan Covid-19 hrilengin khawvel ram hrang hrang a tih buai nasat thu sawiin "Hnahthial District-ah pawh Covid-19 hrileng hi a kiang hleithei lova tun hnai chho ah phei chuan hri kai mi 100 bawr velah kan awm deuh reng a, kan fimkhur leh kan tan tlan a ngai hle a ni" tiin Hnahthial chu Sub-Division hnuaiah kum 20/30 vel a awm hnuah kum 2 che che District anga kalpui a nih mek thu sawiin "mipui sukthlek pawh nasa takin hma a sawn a, hmabak erawh tam tak kan la neiin District hawiher ang zela hmalam kan pan a ngaiin hmana kan tih dan ang kan tih reng chuan hma kan sawn tak tak thei lovang tih a hlauhawmin hma thar kan lak a tul a ni" tiin District Level Committee chuan Hnahthial-a Bazar-na hmunpuiah hian Krismas leh kumthar vuakvetah mipuite chu him leh hahdam taka an Bazar a, Covid-19 hrileng leh boruak bawlhhlawh laka an fihlim theihna turin No Vehicle Zone siam tha an tih tlan thu a sawi bawk a ni.

He huna inkhawm tawi kaihruaitu Hnahthial SP Pu Lalbiakkila chuan No Vehicle Zone buatsaih a nih chhan hre chiang turin mipuite a beisei thu leh duty te thu zawm turin a chah a, "mipuite him tlan nan leh thlamuang taka an bazar theihna tura ruahman a nih angin a ti hlawhtlingtu nih i tum theuh angu" a ti.

Thusawitu dang Pu F.Laldinthara, President, Hnahthial District Village Council Association chuan kawng hrang hranga Hnahthial District tih hmasawnna tura Official ten ruahmanna an kalpui thin chu lawmawm a tih thu sawiin "hmasawnna a awm dawn chuan tawrh a tul hmasak chang pawh awm thin mahse mipui ten thil lo thleng tur chu kan hmuh fiah thiam a, ruahmanna te kan zawm hram hram a tul a ni" tiin Hnahthial a No Vehicle Zone siam chu thuawih taka zawm hram hram turin mipuite a chah nghal a ni

He hunah hian Pu Vanlalbiaka Joute, SDPO Hnahthial pawhin mipuite hriat tur leh zawm tur pawimawh te a sawifiah a, Ni 22, 23, 24, 30 leh 31. 2021 atan mipuite chetvel tamna Bazar kawn Hnahthial chu No Vehicle Zone atan puan a nih thu a tarlang a ni.