4720/2025-2026

Dated Aizawl, the 6th March, 2026: Vawiin khan Mizoram EMRS Society, Planning & Programme Implementation Department hnuaia enkawl Eklavya Model Residential Schools pasarih - Lunglei, Serchhip, Bilkhawthlir, Noaohtlah , Tlangnuam, Tlungvel, Zawlnuamahte HDFC Bank CSR Fund atanga smart classrooms dah tharte chu Pu Vanlaldina Fanai, Member Secretary, Mizoram EMRS Society, Commissioner, Planning and Programme Implementation (P&PI) Department ni bawk chuan a hawng.

Pu Vanlaldina Fanai chuan HDFC Bank hmalakna chu fakawm a tih thu sawiin, tunlai khawvelah technology leh digital literacy a pawimawh tawh zia a tarlang a, chu chu HDFC Bank-te chuan hmu thiama, bengvar taka hetiang tih nachang an hria hi lawmawm a tih thu leh thil entawntlak tak a nih thu a sawi a. Heng smart classroom-te hi EMRS-te tan zirna kawnga hmasawnna rahbi pawimawh tak a ni, a ti a. Corporate sector leh sawrkar thawh dunna tha tak chuan rah duhawm tak a chhuah ngei ringin, zirlai leh zirtirtute pawhin tangkai taka zirna lama hmasawn nan an hman theih ngei a beisei thu a sawi bawk.

He hawnna programme hi Pi Chingthanmawi Guite, CEO, Mizoram EMRS Society, Adviser cum Joint Secretary, P&PI Department nib awk chuan a kaihruai a, Dr. Lalrinchhana, Principal Adviser, P&PI Department leh officer dang leh staff-te an tel bawk a ni. He hun hi HDFC lama an hotu, Pu Kaushik Sharma, Zonal Head leh a thawhpuiten an hmanpui bawk.

HDFC Bank hian December ni 6, 2024 khan EMRS pali - Chawngte, Lawngtlai, Ngopa leh Tuipangahte smart classroom lo pe tawhin, tuna School pasariha hma an lak leh nen hian Mizoram EMRS zawng zawngah (school 11) smart classroom hi dah kim vek tawh a ni.