4719/2025-2026

Dated Aizawl, 6th March 2026: Vawiin khan Agriculture & Farmers Welfare Minister Pu P.C Vanlalruata'n Mizoram district pariata chin tur Tung chi Kg 4500 a vai liam. Tung chi vai liamna hun hi Directorate of Agriculture & Farmers Welfare Office, Aizawl-ah hman niin Agriculture Department Secretary Pi Ramdinliani’n a kaihruai a, India rama Tung lei leh hralh lama hmalatu lian, Himanshu Bansal, Vorya Enterprise, New Delhi pawh biakhmuhtheihna kaltlangin he hunah hian rawn telin Agriculture Department-a thawkte leh Tung chingtu mi eng emaw zat an tel bawk a ni.

Agriculture Minister chuan loneitute din chhuah theihna tur chu a thil vei ber a nih thu sawiin Tung chin chu Mizote rilru sukthlek nena inmil, Mizoram leilung mil bawk si a nih avangin loneitute tan thil tih chi tak a nih tur thu a sawi a. ‘Kum 1990 chhoah sawrkar hmalaknain Mizoram hmun hrang hrangah nasa taka chin lo ni tawh thin mah se a hralhna kawngah tunlai angin khawl leh inbiakpawhnate a la that tawk loh avangin a hlawhtling ta lo a ni’ a ti a. Tunah India ramah Tung hriak (Tung oil) mamawhna a san zel thu leh a tam zawk chu ram dang atanga lak luh vek an nih avangin Mizorama kut hna thawktute tan Tung chin chu tharthawh leh tlak nia a hriat thu sawiin, kum 2025 atang khan Agriculture department kaltlangin Saitual, Khawzawl leh Serchhip district-ahte awmze nei zawka chin tan leh a nih thu a sawi a. Kum 2026 ah phei chuan zau zawkin district 8-a khaw 105-ahte chin a nih tur thu a sawiin Agriculture department-a thawktute chu Farmer-te tan thahnem ngaia, uar lehzuala zirtirnate kalpui thin turin a chah bawk a ni.

Vawiin hun hmannaah hian Agriculture Joint Director (Crops) Pi Lalramhluni hnen atangin Technical Report ngaihthlak a ni a; Pu Himanshu Bansal, Vorya Enterprise, chuan India ramah tung lei tur duhkhawp an hmuh zawh loh avangin China leh Vietnam atangtea an lei nasat thu a sawi a; tunlai khawvel Oil mamawhna sang chho zelah Tung chingtute tan a hralhna kawngah harsatna a awm loh tur thu sawiin Tung lei tura farmer-te nen inremna siam a duh thu pawh a sawi bawk a ni.

Tung hriak hi bungrua (furniture) tih tletna atan te, varnish, paints leh leather tih tletna atan te leh thil dang hrang hrangah an hmang nasa hle a; chin a nih atanga kum 3 bawr velah an rah tan thei a, kum 30 bawr vel thleng an rah thei a ni. A kung karlakah hian thlai dang Vaimim leh Behliangte chin theih bawkin heng Vaimim leh Behliangte hi Central sawrkar ruahman angin NAFED/NCC ten Minimum Support Price (MSP) in an lei thei bawk a ni.