4718/2025-2026

Dated Siaha, the 6 March 2026: Vawiin chawhma dar 11:00AM khan I&PR Conference Hall, Council Vaih; Siahaah Mizoram Upa Pawl Siaha district Assembly vawi 4-na neih a ni a, Pu S. Lalremthanga, Deputy CEM, MADC chuan Khuallian niin a hmanpui a, Pi LS. Lalbiakzuali, District Social Welfare officer, Siaha district chu khualzahawm a ni.

Pu S. Lalremthanga, Deputy CEM, MADC chuan a politics zinkawngah pawl hrang hrangin khuallian atan an sawm ṭhin thu leh, “Mizoram Upa Pawl anga hun vawng dik a la tawn loh thu a sawi.” Upa pawl kal khawmte chu rilru lam tih naupan an zir ṭhaa a hriat thu sawiin, rilru hian nasa takin kan taksa a thunun avangin rilru hrisel nei chhunzawm zel turin kal khawmte duhsakna a hlan.

Kum sawmriat chunglam tamna khua reng reng chu mi harsa tete pawh nise khaw zahawm leh Pathian hriatpui khawpa malsawmna dawng khua an nia a hriat thu khuallian hian a sawi rualin Upate chu rilru fim pu, hun tawnin a tihfin tawh leh thuhnu dawn nachang hria an nih tawh avangin ṭhangtharte tan nundan mawi leh awmdan ṭha zirtirtu ni turin a chah bawk.

Khual zahawm Pi LS Lalbiakzuali, District Social Welfare officer, Siaha district pawhin Mizoram Upa Pawl member kal khawmte chu Upa pawl member-a inziaklut thei tura damna an chang chu vannei a tiin a lawmpui thu a sawi rualin, “Nangmahni neitu kan ni hi kan vannei ve bawk” a ti. Ṭhalaite ruihhloin a tihbuai nasatzia leh chhuan lo la awm zel turte ngaihtuah reng chungin anmahni chhanchhuak tura Upate theihna hi a tlem loh thu sawiin, “Ram changkang apiangah upate an zahin an zalen a, an zahawmna pawh humhim a ni,” chuvangin “khawlai dungah emaw puipunna hmunah emaw ṭhalai ruih neih inhmuh chuan dinchilh ula, sawipui ula; an saltanna bawih aṭanga khaichhuah i tum tlang ang u,” tiin kalkhawmte a sawm bawk.

Vawiin hun hman hi Pu C. Sangnuaia, President, MUP Siaha district-in a kaihruai a, assembly-a kal kum 80 chunglam mi 12 hnenah Pi LS Lalbiakzuali, District Social Welfare officer, Siaha district-in lawmpuina thilpek a hlan. Dr. Ruthi Laldinpuii, Medical Officer (Ayush), District Hospital Siaha chuan hriselna kawnga upate inenkawl dan tur sawiin, H. Vanlaltluangi, P&SM Instructor, District Hospital Siaha-in mahni inchhungkhura taksa an sawizawi dan tur zirtirin a tihpui bawk. Rev. C. Valy chuan lawmthu sawina neiin hun hman tihtawp a ni.