4717/2025-2026

Lawngtlai, 6th March, 2026 : Vawiin chhun dar 12:00 PM khan Tuichawng Group YMA buatsaihin Chapchar Kut 2026 chu YMA Hall, Vathuampuiah hman a ni a. Bawrhsap Pu Donny Lalruatsanga chuan Kut Pa niin a hmanpui.

Kut Pa Pu Donny Lalruatsanga chuan Chapchar Kut chhimtu zawng zawngte chibai bukna neiin, Kut Pa tura an sawm avangin Tuchawng Group YMA hruaitute,Pang Student Association hruaitute leh VC Vathuampui te chungah lawmthu a sawi a ni. Tuichawng Group YMA- te a theihna kawng a tanpui a in huam thu leh theih tawp chhuahpui a in huam thu a tarlang a ni.

Bawrhsap chuan Mizoram leh a chhunga District- te chu ruihhlo leh ruihtheih thilah a him lo a, khawtlangah nghawng tha lo tak a nei a ni tiin, a dona kawngah sawrkarin theihtawp a chhuah mek a ni, a ti. Ruihhlo do na lian tak Operation Jericho kalpui mek a nih thu tarlangin, hemi hnuaiah hian Police, Excise, Assam Riifle, Central YLA, MHIP, LWA, LUP leh MUP te nen hmalak ho mek a nih thu a sawi. Ruihhlo laka fihlim tur leh ruihhlo a kiam theih nan ke pe theuh turin kal khawmte a sawm a ni.

Pu Donny Lalruatsanga chuan kangmei venna kawngah Lawngtlai District- chu a titha ber ni tura hmalak mek a nih thu a sawi a. Ram kang hian environment -tichhiain , nungchate a suat a, boruak a ti chhiaa, chuvangin tul loa ram hal ching thinte hi Village Council- ten zawn chhuah hi an mawh a ni, a titute an phu ang tawk hremna pek a ngai a ni a ti. Sawrkarin lo hal hunte kan bituk a, huan atan leh lo atan ni silo ram kang thin hi a tha lo a ni, chuvangin sorkar thuchhuah te ngai pawimawh turin a chah bawk a ni. Hrisel nan leh khawvel boruak a lo thianghlim a, a lo that zel theih nan YMA kal khawmte kangmei chhuak thelhtu leh ti kangtu ni lo theuh tura fuih bawk.

Kut Pa chuan khawvela hnam ropui Red Indian hnam rothap, hlauh nei lo hnam kha an culture , tradition te humhimna chang an hrelo a, tichuan hnam dang ten an dip ral a, vawiin ni ah chuan a bo tawh a ni, a ti a. Hnam a bo chuan nang pawh i bo ang tiin, khawvel changkang zelah hian kan tawng , kan hnam incheinna, kan hnam lâm te kan vawn nun reng pawimawh hle a ni, a ti . I ram i hnam vawnhimna tha ber chu i culture vawm nun a ni a ti. Pu Donny Lalruatsanga chuan zo nun ze mawi, tlawmngaihna aia upa zah, inremna leh inpumkhatnate chu chhawm nun zel a pawimawh hle tih sawiin, hemi kawnga theihtawp chhuah zel tura fuihin, Chapchar Kut chhintu zawng zawngte duhsakna a hlan nghal bawk.

Tuichawng Group YMA hnuaiah hian Branch -11 awmin, member - 1254 an awm mek a,  Chapchar Kut programme hi zan lamah hman chhunzawm a ni ang.