1878/2024-2025

Dated Hnahthial, the 3rd September, 2024: Vawiin chhun khan DC Conference Hall Hnahthialah Hnahthial District Sports Committee (HDSC) chuan 'Zoliana Royte Memorial 5S Hockey Tournament 2024" khelh zawh taka Women Team Champion, Hnahthial Team te lawmpuina hun an hmang. Lawmpui nan HDSC hmingin Rs. 10,000 Hnahthial District Hockey Association hnenah hlan an ni.

Hun kaihruaitu District Bawrhsap Pi Rita Lalnunmawii Pachuau, Chairman Hnahthial District Sports Committee (HDSC) chuan Hnahthial District Hockey team chu tournament a champion team an ni thei chu lawmawm a tih thu a sawiin sport discipline hrang hrangte hi eizawnna tling a nih tawh avangin ti tak tak a, midang entawn tlaka he an thiamna hi eizawnna tha tak a chantir ngei turin duhsakna a hlan nghal a ni.

District Bawrhsap chuan Pradhan Mantri Jan Vikas Karyakram (PMJVK) scheme hnuaiah Hockey Ground turf phah tura ruahmanna siam niin reiloteah turf ground neih ngei theih a beisei tih a sawi. Players te chu Hnahthial District mai nilo, Mizoram leh India ram tihmingthatu ni tura theih tawp chhuah chhunzawm zel turin a chah bawk a ni.

He hunah hian Pu Zothanmawia Khiangte, Addl. DC, Pu Micky Lalenkawla, DEO, Pu H. Hmingthanzuala leh Pu C. Lalramdinsanga te pawhin report pein thu an sawi a. DC office a officers te, Hnahthial District Sports Committee member te, Hnahthial District Hockey hruaitute leh champion team member te an tel bawk a ni.