1877/2024-2025

Aizawl, the 3rd September, 2024: Vawiin chawhma dar 10:00 khan ICAR-CIFE (Indian Council for Agricultural Research - Central Institute of Fisheries Education) leh Fisheries Department, Govt. of Mizoram tangkawp buatsaih ni 3 awh tur 'Modern Methods of Freshwater Aquaculture' tih thupui hmanga Aizawl District chhunga Fish Farmer thlan chhuah mi 20 te tana training chu Conference Hall, Directorate of Fisheries-ah hawn a ni. He hun hi Fisheries Minister Pu Lalthansanga chuan khuallian niin a hmanpui a, Fish Farmer-te hnenah dil tui thur leh thur lo enna pH kit leh dissolved oxygen enna DO kit-te a sem chhuak nghal a ni.

Fisheries Minister Pu Lalthansanga chuan Sangha khawiin hma a sawn theihna tur leh sangha tam zawk tharchhuahna a nih theih nan Central leh State Sawrkarin nasa takin hma a la tih sawiin, sangha khawi chu ei leh bara intodelhna atana beiseiawm leh pawimawh tak a ni, a ti a. Central Sawrkar hnuaia Scheme atanga hmalak mekna leh hmalak tur tam tak a la awm thu sawiin, Mizote tihdan leh scientific method kaihkawp thiama sangha tam zawk thar tum turin fish farmer-te a fuih a. Tanpuina hmu turte uluk taka thlan a tul thu sawiin, thawktute pawh nasa zawka tan la tur leh a hmun ngeia tlawhchhuak zel thei turin a chah a. Farmer-te chu endik tlaka hma la tura fuihin, an tana buatsaih training programme chu hmang tangkaia an hriat duhte inthlahrung hauh lova zawt fiah turin a fuih a ni.

Thusawitu dang Pu H. Lalengmawia IAS, Commissioner & Secretary, Fisheries Department chuan kalkhawmte lawmna thu  sawiin, CIFE chu Institution hlun tak, Fisheries thiamna lama hmahruaitu leh mi tam tak hnena thiamna petu a ni, a ti a. Mizoramin sangha khawina hmuntha a neih atanga 35% chauh hman tangkai a nih thu tarlangin, hmabak tam tak a la awm a, kan tharchhuah pawh kan tihpun angai a, hetiang training programme buatsaih hian kan tharchhuah tipung ngei se a lawmawm hle ang, a ti a. Cyclone Remal vanga dil sah leh chhiate siamthat ngaite Central lamah dil mek a a nih thu a sawi a. Farmer te'n tunlai thiamna hmanga sangha tam zawk an thar chhuah theih nana tanlakpui chu department thawktute mawhphurhna a nih thu a sawi bawk.

He hunah hian ICAR-CIFE atanga lokal Principal Scientist Dr. Parimal Sardar hnen atangin Training programme chungchang leh sangha khawi dan thianghlim leh changkang zawkte ngaihthlak a ni a. Pi Laltleipuii, Director, Fisheries Department-in lawmthu sawiin hun hman hi a khar a ni.

Ni 3 awh tur training-ah hian ICAR-CIFE, Kolkata atanga lokal Principal Scientist & Head Dr. T.K. Ghoshal, Principal Scientist Dr. Parimal Sardar leh Mizoram Sawrkar Fisheries Department atangin Dr. C. Laltlanmawia, DPM, PMMSY te'n zirtirna an pe ang.