1876/2024-2025

Dated Kolasib the 3rd September, 2024: Vawiin khan Buhchangphai, Kolasib district ah Mega Oilpalm Plantation drive, 2024 neih a ni a. Mega Oilpalm Plantation Drive inkhawm hi Buhchangphai Hall an neih niin, Pu George Lalthanngura (MAS) Jt. Director, Agriculture & Farmers Welfare Department in a kaihruai a ni. 

He hunah hian Pu Robert C Lalhmangaiha, DC Kolasib chuan thu sawiin, Oilpalm chingtute hi an vannei a an la vannei dawn chauh a ni tiin, theihtawp chhuaha tan la zel turin kuthnathawktute chu a fuih a. Hetianga mission mode-a oilpalm hmalakna kalpui a ni chu lawmawm a tih thu sawiin, kuthnathawktute hlawhtlinna atan district administration atanga inpuih theihna a awm chuan theihtawp chhuah a inhuam thu a sawi bawk.

Pu R. Vanlalchhuanga (MAS) Dy. Director, Agriculture Oilpalm in Mega Oilpalm Plantation Drive neih a nih chhan sawiin, he programme hi central sorkar ruahmanna a nih thu leh, India ramin hriak ei chi a kan intodelhna tura hmalakna a ni a, chumi atan chuan Oilpalm chin hi nasa zawka hma kan lak zel theihna tura ruahmanna a nih thu a sawi.

Hei bakah hian Kolasib district-a Buhchangphai khua leh Mamit district-a Darlak leh Nalzawl khua chu central sorkarin Oilpalm hmalakna ah NEH Special scheme atangin khaw thlan bik an nih avangin heng khua atanga Oilpalm chingtu te chu he scheme atang hian a bika enkawlna leh tanpuina chihrang hrang an dawn tur thu a sawi bawk.

Kolasib leh Mamit district a Oilpalm te leikhawmtu Godrej Agrovet Company Sr, Executive Officer Pu Lalruatkima pawhin he hunah hian thu sawiin, Oilpalm hi Oil pechhuak thei thlai zingah chuan oil ngah ber a nih thu sawiin, mizoram a Oilpalm hlawhtlinna avangin tunah chuan kan thenawm state hrang hrang te pawhin Godrej Agrovet enkawlpuina hnuaiah nikum atang khan Oilpalm hi an phun tan ve mek tih sawiin, North east ah hian Oilpalm hi farmer level mai ni lo, business angin kan kalpui tan tawh a ni, a ti a. Tun dinhmunah Kolasib leh Mamit District-a oilpalm huan nei a rah hralh mi 744 vel  awmin nikum chhung khan Oilpalm atangin cheng nuai 700 vel an la lut a,  kuminah hian nuai 800 vel an beisei tih a sawi bawk.

Thusawina hun hman  zawh hian Kolasib district zau hrang hranga Oilpalm phun tur te khuallian Kolasib DC chuan vailiamin Oilpalm a phun nghal bawk.