1875/2024-2025

Aizawl 3rd September, 2024 : Pu Lalnghinglova Hmar, Excise & Narcotics Department Minister hovin vawiin khan MINECO, Secretariat Conference Hall-ah State Level Ruihhlo do working committee thutkhawm a ni.

Meeting kaihruaitu Excise Minister chuan a result nakum lama teh theih turin kumin financial year-ah hian Ruihhlo do dan tur focus bik nei rana rilru siam turin member te a sawm a ni.

Meeting-ah hian Ruihhlo dona tura ruihhlo dotu pawl hrang hrang-a fund sem sawm dan tur thlirho niin heng Excise & Narcotics, Police, FDA, CYMA, MTP, YLA, SWD, MSACS, Mizoram District 11-a sem chhuahte bakah Training, workshop meeting leh Mass Media Campaign nan Sawrkar atangin cheng nuai 200 phalsak an nih thu tarlan a ni a. Sum sem chhuah hnuah tangkai taka hman a nih theih nan uluk taka a hman dan tur leh a hman hun turte inkaihruaina felfai tak duan nise tih a ni bawk.

Vawiina Working Committee on Ruihhlo do thukhawm hian MSD & RB (Mizoram Social Defence & Rehabilitation Board) SW & TA Department buatsaih 'Handbook on Ruihhlo do' tih chu tangkai taka hman atan pawm tlan niin a copy siam belh ni bawk se tih a ni a. Mizoram chhehvela ruihhlo kalkawng zirbing turin Study Team din ni se, District Level Committee on Ruihhlo do-ah Sub Hqrs YMA, MTP leh YLA OB atangin Vice Chairman ruat ni se tih a ni bawk.

Vawiin thutkhawmah hian CYMA, MZP, MJA, Local Council Association, Mizoram Kohhran Hruaitu Committee aiawh bakah Excise and Narcotics, SWTA & WCD, Higher & Technical Department, LESDE, Food & Drugs Administration, Mizoram Social Defence & Rehabilitation Board,  Education leh Police atangin Officials te an tel a ni.