No.484/2021-2022

Kolasib dated 12th May 2021: Pu Lalrinsanga Ralte, MLA, Serlui Assembly Constituency, Rubber & Allied Crops Development Board Vice Chairman ni bawk chuan a bial chhung a Covid-19 hri kai Covid Care Centre a awm mek te thlamuanin an mamawh hrang hrangte chu Jordan Centre, Se?hawn CCC gate pawn ah  thawktute kaltlangin a hlan a. A bial chhung a VLTF hrang hrang te tlawh kualin hrileng dona kawnga inkharkhipna kalpuinaah a tul apiang a hman turin hmaituamna, hand sanitizer leh sumfai a pe bawk.

Pu Lalrinsanga Ralte chuan Covid-19 positive, Jordan Centre, Sethawn CCC-a enkawl mek te chu thawktute kaltlangin ‘Immunity & Protection Kit’ a pe theuh a. He ‘Immunity & Protection Kit’ chhungah hian Digital Thermometre, Vitamin C, Multivitamin, Immunity Booster, Paracetamol, 3 Ply Mask, ORS leh Hand Sanitizer te awmin Mineral Water Case-1 theuh a pe bawk a ni. Serlui bial chhung atang leh Kolasib district chhung atanga Covid-19 positive an awm belh zel a nih pawh a hman turin ‘Immunity & Protection Kit’ hi Jordan Centre, Sethawn CCC ah hian engemawzat bialtu MLA hian a dahsa bawk a ni. Hemi rual hian Pu Lalrinsanga Ralte chuan Kolasib District in Covid-19 Positive enkawlna tur atana an hman Jordan Centre, Sethawn CCC-a hman turin Electric Water Purifier leh Face Mask thahnem tak a pe a, a tul apianga an hman atan cheng Singkhat (10,000), Dr.Doris Lalnunmawii Sailo, DMS hnenah a pe bawk a ni.

Rubber & Allied Crops Development Board Vice Chairman chuan hripui dona kawngah Mizoram sawrkar chuan theihtawp a chhuah mek a ni, a ti a. India ram pum a Covid-19 Vaccine indaihlohna kar ah Chief Minister leh Health Minister hmalakna avangin kum 18-44 inkarte'n Covid-19 Vaccine a thlawn a an lak thuai thei nan ruahmanna a kal mek thu leh Ventilator engemawzat lei belh mek a nih thu a sawi bawk a ni.

Serlui bialtu MLA chuan Rengtekawn leh New Builum VLTF-te duty-na hmun tlawhin inkharkhipna avanga khawtlang a harsatna awmte chu Sawrkar thuneitute hnena thlen zung zung thin turin a chah a, hripui leng avanga khawtlang a buaina leh harsatnate, eizawnna hrang hrang a nghawng nasat thu leh pawi a tih thu sawiin,”He hrileng hian inthinhrikna leh indemtawnna ni lovin, induhsaktawna leh inhmangaihna, intanpuitawn duhna thinlung hring chhuak ngei se ka duh a ni,” a ti a,” Inkhuahkhirhna kalpui chhung hian tumah chhuanchhawm awm lo turin kan tang ho zel dawn a ni,” a ti bawk. VLTF-te hnenah hian sumfai, Hand Sanitizer litre 5 leh Face Mask 200 theuh a pe bawk a ni.

Pu Lalrinsanga Ralte hi Jordan Centre, Sethawn CCC ah hian Dr. Doris Lalnunmawii Sailo, DMS, Kolasib, Dr. C. Vanlalhlimpuia, Medical i/c, Jordan Centre, Sethawn CCC leh Dr. Hmingthanzuala, DIPRO, Kolasib ten an tawiawm a ni.