982/2022-2023
Vawiin khan Health and Family Welfare Minister Dr R Lalthangliana chuan NABARD RIDF-XXV sum Rs.258.943 lakhs senga sak Pangzawl Primary Health Centre (PHC) a hawng.

Hawnna inkhawm ah hian bialtu MLA leh MYC Chairman Dr Vanlaltanpuia, H&FW Principal Director Dr T. Lalhmangaihi, Director Health Services Dr C. Lalzepuii, Director, H&ME Dr KK Chhetri, Hnahthial DC Pu R. Lalremsanga, Hnahthial SP Pu Lalbiakkila Tlau leh District official dangte, khawtlang hruaitute leh party hruaitute an tel a ni.

Hawnna inkhawm Dr T. Lalhmangaihi, Principal Director H&FW Department kaihhruaiah Minister Dr R Lalthangliana chuan Pangzawl PHC chu Hnahthial District thar in a ken tel hmasawnna ruhrel 'infrastructure development' pawimawh tak pakhat a ni tiin Pangzawl leh a chhehvel khua mipuiten tangkai taka an hman theih turin duhsakna a hlan a. Health and Family Welfare Department hnuaia ruhrel te tih changtlun hna Mizoram pumah kalpui mek zel niin Pangzawl Sub Centre sak that nan NABARD kaltlangin cheng nuai 39.40 leh Chhipphir isolation ward sak nan cheng nuai 42.30 ruahman tawh bakah Haulawng leh Mualthuam ruhrel te ti changtlung tura hmalakna a kal mek thu a sawi a. JICA kaltlanga cheng vaibelchhe 660 project, Mizoram State Cancer Superspeciality Hospital tur pawh DoNER, Ministry of External Affairs, NITI Aayog, leh Ministry of H&FW ten phalna pe tawhin bultan thuai a nih tur thu a sawi.

H&FW Minister chuan thingtlang khuaa health infrastructure leh primary health care tih hmasawn chu a ngaih pawimawh hmasak thu sawiin Mizorama Sub Centre 313 chu Health & Wellness Centre ah upgrade vek tura hmalakna kal mek zelin Health & Wellness officer (BSc Nursing leh Ayush doctor) ten an enkawl tawh dawn a ni, a ti a.

Covid-19 hrilengin hun rei tak min tihbuai karah H&FW Department thawktuten damlote damna thlen turin theihtawp chhuahin NITI Aayog Health Index 2021- Smaller States Ranking ah Mizoram chuan pakhatna dinhmun hial hauh in,hriselna tehfung pawimawh tak Infant Mortality Rate (IMR) - naupang kum khat hnuai lam thi zat tehna ah pawh Mizoram chu India ram pumah ti tha ber kan nih thu a sawi a ni.

Heng hmalaknate chak taka kalpui mek anih laiin Mizoramin harsatna liantham tak a tawh mek chu doctor te indaihlohna hi a ni tiin tun hnai maiah doctor thahnem tak an pension bakah doctor engemawzat specialist zir leh mek te an awm a, sawrkar doctor lak thar kan mamawh takzet a ni, a ti a. Thingtlang khua leh hmun kilkhawr zawka cheng te hriselna enkawl turin kan thalai rual doctor te hi an rawn pen chhuah a tul takzet a ni tiin doctor zir chhuak tharte pawh thingtlang lam posting inhuama pen chhuak tura a duh thu H&FW Minister chuan a sawi a ni.

Bialtu MLA, MYC Chairman Dr Vanlaltanpuia pawhin thu sawiin PHC thar hawn chu Pangzawl mipuite tan ni chhinchhiah tlak tak leh hmasawnna mellung pawimawh tak a ni tiin he hmasawnna ruhrel pawimawh tak ti hlawhtling tura theihtawp chhuaha hma la tu H&FW Minister Dr R. Lalthangliana leh Department hotute chungah lawmthu a sawi a. Pangzawl leh a chhehvel khua mipuite chu an PHC neih thar hmang tangkai tura chahin hriselna leh faina kawnga hmasawn zel tura mitinte tan la turin a chah a ni.

Dr C. Lalzepuii, Director Health Services, H&FW Department leh Hnahthial DC Pu R. Lalremsanga te pawhin thu sawiin Dr Lalrinthangi, SMO Lunglei chuan lawmthu sawina hun a hmang a ni.

Pangzawl Primary Health Centre hi NABARD sum Rs. 258.943 lakhs senga sak a ni a. RCC Building a sak niin a zau zawng total floor Area 523 Square Metre a ni a. CB Engineering, Venghlui sak niin 23/09/2020 a hna tan chu 15/02/2022 ah zawhfel a ni a, ground floor leh 1st floor a awm a ni. He PHC hi changtlung taka ruahman niin Male ward (5 beds) leh female ward (5 beds) bakah XRay Room, Laboratory Room, Casualty, Pharmacy, OPD, Operation theatre, labour room, nursing station, Medical Officer Office leh toilet, changing room etc engemawzat a awm a ni.

He PHC ah hian Medical Officer Dr VL Hmangaihzeli awm mekin tun dinhmunah staff nurse pakhat (1), nurse pathum (3) leh fourth grade pahnih (3), health worker panga (5), health and wellness officer pakhat, Block account manager pakhat an thawk mek.He PHC hian Rawpui Sub Centre leh Pangzawl Sub Centre te huamin Lungmawi khua pawh a huam tel a ni.