981/2022-2023
Dated Serchhip, the 21st June, 2022: Vawiin khan Er. Lalrinawma, Deputy Speaker,Tuikum bialtu MLA ni bawk chuan a bial chhung khua Hmawngkawn ah Health Clinic Centre a hawng.

Er. Lalrinawma chuan, a bial chhunga Health Sub-centre awm lohna hmun khua; Vanchengte, Hmawngkawn, Darlawng, Phulmawi ,Chhiahtlang North leh Mualpui Chhingchhip ah te sawrkarin Health Clinic Centre dah tura hma a la hi a lawmawm hle a. Chief Minister Pu Zoramthanga, Health Minister Dr. R. Lalthangliana leh sawrkar chungah lawmthu ka sawi a ni, a ti. Mizorama Sub-centre awmsa engemaw zatte chu Health and Wellness Centre ah hlan kai an lo tawh a, kan bial chhunga Sub Centre te pawh Health & Wellness Centre ah hian hlankai an ni deuh vek tawh a ni. Mipuite hriselna atana sawrkar hmalakna hi a lianin a ropui hle a ni, a ti a. Sawrkar hmalakna kal zelah Sub Centre la awm lohna hmunah Clinic Centre hawngin hma kan la chho leh mek a ni a, kan nihlawh hle a ni tiin sawrkar chungah lawmthu a sawi a. Clinic Centre a awm theih nana Hmawngkawn khawtlang mipui, VC leh NGO te tanrualnaah lawmthu a sawi bawk a ni.

Hmawngkawn a Health Clinic Centre hawn anih hma hian Buhkangkawn ah pawh Health Clinic Centre hawn a lo ni tawh a. Hmawngkawn Health Clinic Centre hawn thar hi Sawrkar inpeih hma chuan MLA Fund atangin Healthworker lo rawih rih tur a ni dawn a ni.

Health Clinic Centre hawnna hi Pu T. Lalrinfela, VCP in a kaihruai a, bialtu MLA Er. Lalrinawma'n an khawtlang hmasawnna tur atana theihtawp a chhuah thinnaah lawmthu sawiin, a inpekna chu entawn tlak a tih thu a tarlang a ni.