Vawiin chawhma khan Health and Family Welfare Minister leh bialtu MLA ni bawk Dr R Lalthangliana chuan Rs.108. 97 lakhs senga sak Thingsai Primary Health Centre (PHC) a hawng.

Hawnna inkhawm Dr F. Lallianhlira, Principal Director H&FW Department kaihhruaiah Minister Dr R Lalthangliana chuan Thingsai PHC chu Hnahthial District thar ina a ken tel hmasawnna ruhrel 'infrastructure development' pawimawh tak pakhat a ni tiin Thingsai leh a chhehvel khua mipuiten tangkai taka an hman theih turin duhsakna a hlan a.

Bul kan tan tawh chu tha takin a tawp kan thleng tur a ni tiin Hnahthial District ti hmasawn zel tura pawimawh hrang hrang - inkalpawhna kawng siam that, zirna in thuam that leh Higher Secondary School - te government a hlan kai, PHC leh Sub Centre - te mamawh hmanrua leh staff te dah, sawrkar pisa leh quarter-te, mipui mamawh em em Bank branch hawn kawngah te hmalak mek zel anih thu kalkhawmte a hrilh a ni.

A Department chan hnuaia hnathawhna kal mek te pawh sawilangin Commerce and Industries Department hnuaia Border Trade hmalakna chungchang ah sawrkar laipui official - te nen indawrin heng official - te hian a hmun ngeia Mizoram Border Trade hmalakna rawn hmu tur leh hmachhawp thlir ho turin Mizoram rawn tlawh thuai an tum thu a sawi a. Thingsai chu Myanmar border maia awm anih avangin border trade ah ala pawimawh chho zel dawn a ni, a ti bawk. Health and Family Welfare Department hnuaia Hospital, PHC, Sub Centre te ti changtlung zel tura World Bank hotute vawi hnih lai a dawr thu leh heng PHC leh Sub Centre te mipuite tana tangkai zawk turin Health and Wellness Center ah hlan kai zel an ni dawn a ni, a ti bawk. Mipuite hriselna sawrkarin a ngaih pawimawh takzet thu sawiin 1st October 2019 khan Mizoram State Healthcare Scheme (MSHCS) hman tan niin he scheme atan hian kum tin cheng vaibelchhe 100 dah a ni a. MSHCS hnuaiah hian chhungkaw khatin kum khatah damdawiina inenkawlna senso Rs 2,00,000/- (nuaihnih) thleng an bill thei dawn a ni tiin mipuiten tangkai taka an hman ngei a beisei thu a sawi bawk.

Dr ZR Thiamsanga, MLA, Vice Chairman Health and Family Welfare Board pawhin thu sawiin PHC thar hawn chu Thingsai mipuite tan ni chhinchhiah tlak tak leh hmasawnna mellung pawimawh tak a ni, a ti a. Mizoram mipuite hriselna dinhmun chawikang zel turin Health and Family Welfare Department-in theihtawp a chhuah mek zel thu sawiin Mizoram sawrkar Health Care Scheme pawh mipuite tan uluk taka duan a nih thu a tarlang.

Hnahthial DC Pu Vanlalmawia pawhin thu sawiin Hnahthial District huam chhunga khaw lian leh pawimawh tak Thingsai ah PHC changtlung tak hawn a ni chu lawmawm tiin Minister Dr R Lalthangliana leh H&FW Department chungah lawmthu a sawi a. Thingsai leh a chhehvel khua mipuite chu an PHC neih thar hmang tangkai tura chahin hriselna leh faina kawnga hmasawn zel tura mitinte tan la turin a chah a. Hnahthial District chu District naupang tak la ni mah se kawng hrang hranga District dangte tana entawn tlak thei khawp ni tura theihtawp chhuah tlang tura hmalak puiah sawmin inthlahrung hauh lova thurawn pe fo thin turin a sawm bawk.

Er Pazawna, EE PWD Building Division, Lunglei  hnen atanga Technical Report ngaihthlak niin Pu S Muanvela, VCP Thingsai pawhin thusawina hun a hmang a. Dr Eric Zomawia, Mission Director, NHM in lawmthu sawina hun a hmang a ni.

He hunah hian Dr ZR Thiamsanga, MLA, Vice Chairman Health & Family Welfare Board, Pu C. Ramhluna, Ex-MLA & Vice Chairman, Industrial Development Board, Pu C. Lalrammawia, Chairman ZOHANDCO, Hnahthial DC Pu Vanlalmawia, Hnahthial SP Pu Devesh , Lunglei CMO Dr Thani Pachuau leh official engemawzat leh khawtlang hruaitute leh mipui thahnem tak an kalkhawm.

Thingsai Primary Health Centre hi Rs. 108.97 lakhs senga sak a ni a. RCC Building a sak niin a zau zawng Plinth Area 469.53 Square Metre a ni a. Heh PHC hi changtlung taka ruahman niin Male ward (3 beds) leh female ward (3 beds) bakah XRay Room, Dark Room, Laboratory Room, Dispensary, Consultation room, waiting area, office, Delivery room, sterile room, kitchen, Nurse station, Minor OT, Dry Zone, leh inthiarna toilet panga(5) leh Bathroom pahnih (2) a awm a ni.

He PHC enkawl tur hian Medical Officer dah ngheh nghal niin July 2019 atang khan Dr Betty Laldintluangi post a ni a. Tun dinhmunah nurse pathum (3) leh fourth grade pahnih (2) an thawk mek a. Thingsai khua leh a chhehvel mipuiten he PHC hi an hlut hle a, pawl hrang hrang leh mimal ten thilpek - plastic chair te, sana engemawzat, dust bin, thuthleng etc an present tawh a ni.