Tukin zingkarah khan Deputy Chief Minister Pu Tawnluia chuan PWD in PCC Flooring hmanga an siam, Vaivakawn atanga Bazar Bungkawn chhuah chhohna  kawngpui, Metre 787 a thui chu mipui vantlangin tangkai taka an hman atan a hawng a. He hunah hian Pu Lalruatkima, bialtu MLA leh Minister of State for RD, I&PR,etc leh mi pawimawh dangte pawh an tel a ni. 

Dy CM Pu Tawnluia chuan helai kawngpui chu chhuahlam mipui tan malsawmna a nih a beisei thu a sawi a. Vaivakawn atang Dawrpui panna hunchhung a tih tawi bakah  veivak te tan sum sen a ti tlem zawka, rikrum thulha Damdawi In panna atan phei chuan a pawimawh takzet a ni a ti. “Kan Chief Minister Pu Zoramthanga hmatlir lo neih tawh angin a theih chin chinah a tlo thei ang ber tur ngaihtuaha kawngpui te siam a ni zel dawn a. Heng hmalaknaah te hian mipuite phungbawm leh thlawpna a pawimawh hle dawn a ni”, a ti. Mipui vantlangin Aizawl khawpui chhunga lirthei tawt lutuk avanga harsatna an tawh mek te sutkian tumin sawrkar chuan theih tawpin hna a thawk mek a. PAHOSS kaltlangin lirthei seng thawl a ni dawn tih a sawi a. Vaivakawnah leh Bawngkawnah te Traffic tawt lutuk sutkian nan Flyover siam turin sawrkarin UD&PA hnuaia bul a tan tawh a. UD&PA hnuaiah tho Aizawl khawpui chhunga kawngpengthuam 14 leh district khawpui a kawngpengthuam lian deuhte nawr zauh tum a ni a. A siamna tur sum , cheng Vaibelchhe 10 pawh neih a ni tawh a ni a ti. Dy CM Pu Tawnluia chuan, “Kawng tangkaina leh hlutzia kan hre telh telh a, kan neih sum tam tak senga kawngpui kan siam te hi a dimdawi nachang hre tur leh kan tan a tangkai zia hriaa duat nachang hre theuh turin kan in sawmin kan in ngen a ni”, a ti. 

Pu Lalruatkima, Minister of State, RD, I&PR,etc leh bialtu MLA ni bawk chuan helai kawng pawimawhna leh mipui mamawhna san zia a sawi a. Vaivakawn leh Dawrpui Vengthar  leh Dinthar tan mai ni lovin Aizawl tlak lama veng awm zawng zawng tana Bazar leh Civil Hospital panna a nih thu a sawi a. He kawngpui thui lo tak, Aizawl khawpui chhunga pawimawh ber pawl ni si chu tlo tur anga bera hisap siam a ni ta chu thil lawmawm tak a ni a ti a. A siam hna thawktu leh a tawiawmtu chungah bial chhung mipui leh Aizawl tlak lam mipuite aiawhin lawmthu a sawi a ni. 

Tukina Vaivakawn-Dawrpui kawngpui hawnna programme hi Pu R. Thanglura, Councillor, Ward XII, AMC chuan a kaihruai a. Official leh khawtlang hruaitute an tel a ni.