Vawiin tlai khan Public Health Engineering Department chuan Chaltlang Tourist Lodge ah tunhnai a an Department in hlawhtlinna leh hmasawnna hrang hrang an neih te lawmna "Lawmna Pui" an nei a, Deputy Chief Minister, anmahni changtu ni bawk Pu Tawnluia'n he hun hi a hmanpui a ni.

He hun hmanpuitu Deputy Chief Minister chuan PHE Department chu Department upa ber te zing ami a ni lova, a tirah PWD hnuaiah awmin kum 1983 khan SE pakhat hovin an indang ve chauh a, tun hun thlenga hma an sawn dan hi a lawmawm a ni a ti a. Mipuite hriselna atana pawimawh tak tui leh faina chungchanga hma la tura ruat an ni hi a lawmawm rualin mawhphurhna sang tak a ni a ti a, PHED in hlawhtlinna leh hmasawnna chi hrang hrang a hmuh te chu an thahrui tichaktu nise a duh thu a sawi bawk.

Deputy Chief Minister chuan tuihna humhalh a ngaihpawimawh thu sawiin, tuihna tlem chak ta lutuk hian tunhma a khawtin deuhthaw tui lakna kan siam sak thin kan hnathawh tha tak tak te kha a pawt hniam tan a ni a ti a, tuihna humhalh a tuaithar leh a pawimawh thu leh Mizoramin ruahtui tha tak kan dawn te awmze nei a khawl dan tur ngaihtuah te a pawimawh thu a sawi a, mipuiten hnianghnar taka tui thianghlim in tur kan neih reng theihnan theihtawp chhuah a pawimawh a ni a ti a. Phai lam atanga ruahmanna an rawn siam thin te chu India ram puma angkhata hman tur a tih a ni fo thin a, Mizorama kan chhawr hleihtheih loh tur a awm thin a, hetiangah hian kan ram mila siamrem thiam a pawimawh a ni a ti a. Department dangte nen thawhhona kawngah thawhpui nuam ni zel tura chahin Department hmasawnna tur chuan theihtawp chhuah zel a tum thu a sawi.

PHED hian tunhnaia hmasawnna leh hlawhtlinna hrang hrang an hmuh WSSO Director post an neih thar, State Referral Institute (State Laboratory) in NABL atanga Accreditation an leh an department chhunga promotion hmu te lawmpuina lehkha Superannuation pension a chhuakte thlahna an hmang a, tunhnaia Inter-Departmental Sports, 2019 a lawmman pahnihna an lak an lawm tel bawk a ni.

Vawiin Lawmna Pui inkhawm hi Er. Anup Chhetri, SE (Monitoring) in a kaihruai a, Superannuation pension a chhuak Er. K. Zohmingliana, Sr. EE hnenah lawmpuina thuziak hlan a ni bawk.