Vawiin chawhnu khan Arya Mess, Police Headquarters, Khatla ah Tourist Police Mizoram vailiamna hun hman a ni a, Pu Lalchamliana, Home minister chu khuallian niin Pu Robert Romawia Royte, Minister of State for Tourism Department chu khual zahawm a ni bawk.

Home Minister Pu Lalchamliana chuan Mizoram chu zinmite hip thei tura ram leilung mawi tak nei kan nih avangin Tourist-te dawngsawng tura a bika siam Mizoram Tourist Police hnathawk tan thei tura din a ni chu lawmawm a tih thu a sawi a, ram pawn atanga minlo tlawhtute laka kan ram leh hnam hmel tilangtu tur an nih avangin inbiakpawhna kawnga harsatna awmlo tur te leh chetzia leh tawngkam hman ahte hawihhawnna leh zahawmna vawng tlat turin a chah. Home minister chuan Mizoram ralmuanna leh Tourist Police din tharte avanga Tourist tam zawk hipna kawngah hmasawnna a awm ngei a beisei thu sawiin Tourist Police te chu an hna tha taka thawk turin duhsakna a hlan nghal bawk a ni.

Mizoram Tourist Police vailiamna hun hi Pu John Neihlaia, IPS, IGP (Hqrs) in a kaihruaia Pu Robert Romawia Royte, Tourism Minister leh Pu Lalnunmawia Chuaungo, Chief Secretary ten thu sawina hun an hmang a, Pu SBK Singh, IPS, DGP, Mizoram in Mizoram Tourist Police din anih theih nana hmalak dan tlangpui tarlanna hun a hmang bawk a ni. Tourist Police chungchanga vedio tawi siam thlir ho niin Pu LH Shanliana, IPS, IGP (L&O) in lawmthu sawina hun a hmang a, he hunah hian Police department officer, Tourism department hotute, Assam rifles, CRPF, BSF aiawh te an tel a ni.

Vawiin Mizoram Tourist Police hna thawh tan tura vailiam te hi mi 12 leh driver 5 an ni a, Mizorama zinmite leh mipuite tlawh hlawh hmun panga (5) ah an duty tan dawn a ni. Tun atana an duty-na tur hmun te chu Entry & Exit point Lengpui Airport, Thenzawl, Solomon’s Temple Aizawl, Millennium Centre, Aizawl leh Zokhawthar, Champhai te a ni a Hmuifang, Reiek leh Tourist Lodge, Chaltlang a duty indah thuai thei tura ruahman mek a ni bawk a ni.