Vawiin khan Chief Minister Pu Zoramthanga chuan Regional Institute of Paramedical and Nursing Sciences(RIPANS)  ah kumina Nursing leh Paramedical Course hrang hranga zirlai pass thar te graduation lawmna leh Bachelor of Nursing zirlai thar 35-te lawmluhna Lamp Lighting Ceremony chu khuallian niin a hmanpui a. Zirlai titha zual te hnenah Proficiency Award a hlan bawk.

Chief Minister chuan graduate tharte chu a lawmpui thu a sawi a. Mahni mihring puite tan an thiamna hmang a, enkawl dam hna thawh chu hna ropui tak a nih thu sawiin, zirlai pass tharte chu an kal zelna turah pawh taima leh rinawm taka an thawh zui a, hlawhtlinna an chan chhoh zel turin a duhsakna a hlan. Chief Minister chuan Mizoramah mihring hriselna tihhmasawn a inenkawlna tha zawk neih chu sawrkarin a ngaihpawimawh thu a sawi a. Chumi atan chuan sawrkar chauhin thil a tih theihloh thu leh, hriselna kawnga ramin hma a sawn tak tak dawn chuan mipui tawiawmna a mamawh thu a sawi. Chief Minister chuan RIPANS pawh changtlung zawka siam tura hmalakna awm mek chu lawmawm a tih thu sawiin, thawktu indaihlohna avanga harsatna an tawh chungchangah theih tawp chhuahpui a tum thu a sawi a ni.

Chief Minister chuan graduate thar te zingah an department theuh a titha zualte hnenah RIPANS Proficiency Award a hlan bawk. Vawiin hunah hian RIPANS Director Dr. Chawngthanliana leh Lamp Lighter Civil Hospital Nursing Superintendent Pi Lalrinthangi ten thu an sawi bawk.

BSc Nursing First year hi an vawiin mi 35 an ni a. RIPANS Director Dr. Chawngthanliana chuan Graduate leh Post Graduate tharte hnenah Certificate of Appreciation a hlan a ni. Kumin hian a vaiin mi 180 zirchhuak an awm a. Chungte chu:
i) B.Sc. Nursing - 36
ii) B.Sc. MLT (Medical Laboratory Technology) - 40
iii) B. Pharm - 23
iv) B. Optometry - 34
v) B.Sc. RIT (Radio Imaging Technology) - 31
vi) M. Pharm - 16

RIPANS hi kum 1996 khan North Eastern Council (NEC) in India hmarchhak mite tan Paramedical leh Health Sciences bik zirna atana din in, kum 2007 April thla atangin sawrkar laipuia Ministry of Health and Family Welfare hnuaiah dah a ni ta a. Tun dinhmunah Degree Course hrang hrang panga - B.Sc Nursing, B.Sc Medical laboratory Technology, B. Pharm, B. Optometry leh B.Sc Radio Imaging Technology bakah October 2014 atang khan Post Graduate Course M. Pharm te awmin, India hmarchhak state hrang hrang atangin zirlaite tan seat hauhsa (quota) neiih zirlai 655 an awm mek a ni. Kum 1996 atanga kumin 2019 thleng hian RIPANS atanga zirchhuak mi 2820 an awm tawh a ni.

Ministry of Health & Family Welfare hnuaia Executive Council meeting kumin kumtir a neihin RIPANS tihchangtlun na turin Rs. 480.12 crores pek a remti a. He hmalakna hnuaiah hian khum 100 awm theihna hospital, Academic building, Indoor Sports Complex cum Auditorium, P.G. Hostel, Guest House, Medical Superintendent Quarter, Doctor Quarter, Nurses/ Staff quarter sakna tur te, thawktu post 154 siam belhna tur leh Course thar pasarih hawnna tur te a tel a ni.

Attachment

  • Loading attachment...