No.6914/2020-2021

Kawrpuichhuah border trade chungchanga Tlabunga zin Health and Family Welfare Department changtu Minister Dr R. Lalthangliana chuan nimin khan Tlabung Sub Division Hospital tlawhin thawktute nen inkawmhona hun an hmang.

Tlabung Sub Division Hospital-ah SMO Dr R.Lalnienga leh a thawhpuiten lo hmuakin Tlabung SDH hi an fang kual a. Minister hnenah hian an harsatna leh mamawhte anlo thlen a ni. Tlabung SDH-ah hian khum 30 awmin  thawktu an zavaiin mi 42 an awm a, doctor pali (SMO, MO, MO Ayush leh MO Ayush (contract) an awm a ni.

Tlabung SDH-a inkhawm tawi neihah Health Minister chuan H&FW Department thawktute thawhrimna leh inpekna chu fakawm a tih thu sawiin mi harsa leh natna khirh tak tak vei te thahnemngai tak leh hmangaih taka an lo enkawl thin avangin an chungah lawmthu a sawi a. Mizoram chu Covid-19 do kawngah India rama thawk tha berte zing ami kan nih thu leh tun dinhmunah Covid-19 vanga nunna chan tlem berna state kan nih thu sawiin hei hi Department thawktute, LTF-te, kohhran leh Mizoram mipui tan hona rah a ni a ti a. Covid-19 do kawnga theihtawp chhuaha hma la tu VLTF, Tlabung mipuite leh ramri hrula hun rei tak duty Khawthlangtuipui Group YMA-te chungah lawmthu a sawi a ni. Tlabung SDH mamawh thlente pawh ngaihven sak thuai an nih tur thu sawiin thawktute Christmas lawmna turin cheng sing khat a hlan a ni.

H&FW Department hmalaknain 10th February, 2020 atang khan Kawrpuichhuah-ah ‘Coronavirus Screening Point’ siam tan niin Medical Team-te nitin an duty thin a. 2nd March, 2020-ah khan Missionary Kai leh Licheng Kai ah te ‘Coronavirus Screening Point’ hi neih belh niin 20th March, 2020 thleng khan screening hi kalpui a ni a, screening kalpui chhung hian COVID-19 vei hmuhchhuah an awmlo a ni.

Khawthlangtuipui Group YMA hnuaia YMA branch Pali (4) awmte - Tlabung Branch, Zodin Branch, Chawnpui Branch leh Chawilung Branch-te chuan riahbuk sualin ramri hrulah 3rd May, 2020 atanga 15th August,2020 thleng ramri venghimin an duty a.  August 16 atanga September 15 thleng khaw daifemah insawn hnaiin riahbuk sual leh a ni.

Tlabung Sub Division chhungah hian mi 332 quarantine tawh niin Covid-19 positive pakhat hmuhchhuah awm tawhin CCC atanga dam taka chhuah tir tawh a ni