1491/2026-2027

Dated Aizawl, the 22nd May, 2026 : Vawiin khan Aizawl Civil Hospital Conference Hall-ah Health and Family Welfare Minister Pi Lalrinpuii chuan Aizawl Civil Hospital-in Kayakalp Award 2025-2026-a pakhatna lawmman an dawn lawmna chu khuallian niin a hmanpui.

Pi Lalrinpuii chuan Aizawl Civil Hospital chu sawrkar a doctor thiam ber berte leh hmanraw changkang leh chhuak thar chi tinreng a thuam a nih avangin mipui pawhin an pan nasa a, thawktute pawh an hah hle chunga hospital enkawl faina lawmman Kayakalp Award an dawng thei chu chhuanawm a tih thu a sawi a. India ram Danpui chuan mipuite dikna chanvo a pek zingah Right to Health a tel tlat avangin sawrkar hnathawk, a bikin damdawi in a thawktute zawng zawng in kan zah sak a, damlo te kan lo dawnsawnna kawng hrang hrangah pawh theihtawp kan chhuah thar a ngai, a ti.

Minister chuan MUHCS hman tan a nih dawn khan thawktu indaihloh phuhrukna turin Aizawl Civil Hospital chu nurse 300, multitasking staff 100, paramedical staff 47 leh medical officer engemaw zatin thuam chak a nih thu a sawi a. Tun hnaiah Kal thlakna – Kidney Transplant bultanna tura sum mamawh belh cheng nuai 48 vel pawh Finance Department lam dil mek a ni a; lung lam enna - Cath Lab thar leh MRI khawl thar bun niin, PSA (Pressure Swing Adsorption) Oxygen Plant nuai 80 man pawh bun a ni tawh a, Trauma Centre Building pawh luah luh tawh niin a chung zawmna tur CSR atangin hmuh an in beisei thu a sawi bawk. Hospital hmanrua khawl hrang hrang ten electric an mamawh reng avangin P&E Department hnenah Power Line ti chak tura dil a nih hnuah  Finance Deparmtent in hemi atana senso cheng nuai 109.43 pawh a pawm tawh a, Trauma Centre atan Diesel Generator thar buaipui mek a nih thu a sawi bawk.

Minister chuan mipuiten damdawi in fai leh thianghlim a inentir an phu a, mipuiten damdawi in tha leh tha lo an tehna tam tak pawh hi faina leh thianghlimnaah a innghah avangin thawktu zawng zawngte chu faina leh thianghlimna kawngah hma la chhunzawm zel turin a fuih a, damlo damdawi in pan tu te chu hawihhawm taka lo dawngsawng a nui hmel pu tam turin thawktute chu a fuih bawk a ni.

Kayakalp Award lawmna hun hi Health and Family Welfare Commisioner and Secretary Pi K. Lalrinzuali chuan a kaihruai a, Senior Medical Superintendent Dr. Lalchhuankimi chuan report a pe a, (Report chu a kimchangin a hnuaiah ziah a ni) Principal Director Dr. Lalthlengliani pawhin thu sawina hun a hmang a. Medical Superintendent Dr. K. Rothangpuia chuan lawmthu sawinain he hun hi a khar a ni.

‘Kayakalp’ hi Sanskrit tawng a ni a, ‘Transformation/Rejuvenation’ tihna a ni. Sawrkar damdawi in fai tehna a ni a, Swachh Bharat Mission hnuaia Ministry of Health and Family Welfare buatsaih a ni. Aizawl Civil Hospital hian ‘District Hospital’ fai ber lawmman an dawng a, kum 2015 khan an lo dawng tawh bawk a ni. Kayakalp Award dawng tur hian damdawi in te hian Internal Assessment an tih hnuah Peer Assessment leh External Assessment te an paltlang a ngai a ni.

Aizawl Civil Hospital Achievement Report 2025-2026

RADIO DIAGNOSIS & IMAGING (RD&I) :

i) June 2025-ah MRI khawl bun a ni.

ii) X-Ray khawl thar Horizon 630mA chu January ni 21-ah bun fel a ni a, Printer thar a keng tel. 

iii) June 2026 khan Trauma Centre-ah X-Ray khawl thar 630mA bakah Ultrasound khawl thar leh a ken tel thil dang te nen bun fel a ni.

CARDIOLOGY DEPARTMENT

i) Cardiac Catherisation Cath Lab thar chu January ni 26 ah hman țan a ni. A țangkaina te chu :-

a) Lung tihrawl chawmtu thisem zam block leh block loh enna a ni a. A lo block chuan Sten vuah thin a ni.

b) Pacemaker (Lungphu battery) a vuah theih.

c) Lungpawp thenkhat a thawm theih.

ii) Damlo zai tawh zat :

a) Coronary angiography - 108 

b) Angioplasty/Stenting - 68

c) Permanent Pacemaker implantation - 44

d) Temporary Pacemaker - 12

e) Intravascular Ultrasound (IVUS) - 3

f) Pericardiocentesis - 1

BMW (BIO MEDICAL WASTE) STORE ROOM:

Bio Medical Waste hi damdawi in a damlo te enkawlna ningnawi, bawlhhlawh dang zinga paih chi si lo te an ni ber a. Heng bawlhhlawh te fun that a, a paihna hmuna paih an nih hma a lo dah lai lawkna tur hmun BMW Storage Room hi Trauma Centre hnungah Mizoram Health Systems Strengthening Project (MHSSP) sum hmanga siam thar neih a ni a. Authorization leh Consent to Operate Certifcate pawh kum 10 chhung atan Mizoram Pollution Control Board chuan a pe bawk.

EFFLUENT TREATMENT PLANT (ETP) :

ETP hi damlote ațanga thisen/tuiril chhuak midangte tan a hlauhawm thei tihthianghlimna Khawl a ni a. He Khawlah hian OT/Lab/Ward etc atanga tuiril chhuak te kal khawm in, Damdawi nena sawngbawl a nih hnu ah vantlang tuiluankawr a paih zui ngam ani a, pangpar tui atan te pawh a hman tlak a sawi a ni.

EMERGENCY DEPARTMENT:

i) Emergency dept. hi January ni 30,2026 ah Trauma Centre building tharah an insawn lut.

ii) Tunah chuan Emergency Dept. hi Emergency Laboratory, X-Ray khawl, Ultrasound te an nei tawh.

MEDICAL RECORD DEPARTMENT:

i) Medical Record Department a damlo te Medical Records chu Digitalized a ni a. Hei hi MUHCS atan te, DNB Student leh Research Scholars te tan a tangkaiin, awlsam takin a Soft Copy pawh a lak chhuah theih a ni

ii) Online OPD leh Cash counter siam belh a nih avangin damlo in tlar thui lutuk pawh a ziaawm phah.

OBST. & GYNAE DEPARTMENT :

i) Moduler OT tunah hian siam zawh thawkhat a ni.

ii) Maternity HDU thar siam zawh tawh a ni a, Staff awm veleh hman a ni ang. ii) QA hnuaiah Laqshya tha takin an kal pui.

PAEDIATRIC DEPARTMENT:

i) Neonatologist an neih tak avangin SNCU chu tha takin kalpui theih a ni.

ii) Paediatric Critical Care lamah Super Specialist an neih tak avangin Paediatric HDU leh ICU an nei tawh a ni.

ii) QA hnuaiah Musqan tha takin kal pui a ni.

MICROBIOLOGY DEPARTMENT :

Trunat Machine, Hepatitist Viral Load en theihna an nei thar a, man chawi ngai lovin damlote en theih a ni.

BIOCHEMISTRY :

Heng khawl te hi neih thar a ni: 

i) Merilyzer Gluquant AIC

ii) Maglumi X3

iii) Merilyzer Autoquant 800

NB : Immuno Chemistry an ti thei tawh a, Sample rang zawkin an pe chhuak thei tawh a ni.