1492/2026-2027

Saitual, 23rd July, 2026: Vawiin khan Chawnpui YMA Hall, PWD Kawnah, District Hub for Empowerment of Women (WCD), Saitual hmalaknain, Beti Bachao Beti Padhao (BBBP) flagship scheme hnuaiah hmeichhe naupang kum 10 hnuai lamte tan 'Project Thaichhawninu' hawnna hun hman a ni.

He huna hian Pu V. Lalhmingliana, CDPO i/c DPO, Thingsulthliah chuan thu sawiin 'Project Thaichhawninu' hawnna hun a hmang nghal a ni. CDPO chuan Project Thaichhawninu chu Beti Bachao Beti Padhao (BBBP) flagship scheme hnuaiah hmeichhe naupang kum 10 hnuai lamte tan Sukanya Samriddhi Yojana (SSY) account hawn sak uar tharna atana hmalakna a nih thu a sawi a, he project hi District tinah hawn a ni dawn a ni, a ti. Pu V. Lalhmingliana chuan  India ramah hmeichhe nekchepna a la hluar em em a, India sawrkar chuan hmeichhe naupangte hamthatna tur ngaihtuahin he Project hi a duang a ni, a ti a, a nihna ang taka hmeichhia te hmasawn nana hman a nih theih a beisei thu a sawi bawk a ni.

Project Thaichhawninu hi Mizoram District 11 chhunga RD Block 27, ICDS huam chhung khaw hrang hrangahte kalpui tura ruahman a ni a. He Project hnuaiah hian hmeichhe naupang kum 10 la tling lo te chu Post Office leh State Bank of India (SBI) kaltlangin account hawnsak theih an ni ang a, pawisa khawl sa hi kum tin 8.2% interest rate in a pung dawn a ni. ₹250-in account hi a hawn theih a, thla 1-ah ₹250 chu dah tlem theih ber niin, ₹1,50,000 chu a dah tam theih ber a ni. Hmeichhe naupang hi kum 18 a tlin hunah 50%-college fee atan a la chhuak thei a, kum 21 a tlin hunah a vaiin a la chhuak thei dawn a ni.

Vawiin inkhawm hi Pi Mary Malsawmkimi, DMC, DHEW chuan a kaihruai a, Pu Ramtharmawia, SFL, DHEW chuan ppt hmangin Project Thaichhawninu leh SSY account chungchang a sawifiah a.  Pu V. Lalhmingliana, CDPO i/c DPO, Thingsulthliah bakah hian Pu Lalthansanga Sailo, CDPO, Ngopa leh Pi F. Zodingpuii, DIPRO te chuan thu an sawi bawk a ni.