2047/2026-2027

Dated Aizawl, the 2nd September, 2026 : Vawiin khan Health and Family Welfare Minister Pi Lalrinpuii chuan Mizoram College of Nursing, Falkawnah zirchhuakte thlahna leh zirlai thar lawm luhna hun ‘39th Graduation & Lamp Lighting Ceremony 2026’ chu khuallian niin a hmanpui. Aizawl South III Constituency bialtu MLA Pi Baryl Vanneihsangi chu khaul zahawm a ni.

Health Minister chuan nursing zirchhuakte chu an zir chhungin harsatna tam tak an tawh thin a rin thu sawiin zir chhuak tura an thawhrimna leh taimakna chhuanawm a ti a. Nurse te chu damlote nat ber lai leh damlo chhungte hlauhthawn ber laia thlamuan thintu an nih avangin nurse hna thawk tur chuan finna mai bakah mi dangte hriatthiamna neih a tul, a ti. Damlote chu eng ang mi pawh ni se, mihring an nihna anga zah tak leh ngilnei taka enkawl thin turin a fuih bawk.

Minister chuan graduate tharte chu an nunah thil tum (purpose) nei turin a fuih a. Khawi hmunah pawh thawk se, an dinhmun hruai thlengtu an zirtirtute, an chhungte leh an thenawm khawvengte theihnghilh lo turin a chah a. Nursing chu hna zahawm a ni tiin Pi Lalrinpuii chuan India ram mai bakah foreign thlengin nurse te tan hna thawh tur tam tak a awm a; training laite chu ram pawna hnathawk thei turin an zirlai piah lamah online course chi hrang hrang leh hnam dang tawngte zir thin turin a fuih bawk a ni.

Khualzahawm Pi Baryl Vanneihsangi pawhin graduate tharte chu hna an thawh hnuah pawh inthlahdah mai lova thiamna leh hriatna neih belh tura tang sauh sauh turin a fuih a. An zirlaibu chauh ni lo, an chhehvela thil thlengte pawh hre tura inzir reng turin a fuih a ni. Hna engmah hi nuam tak tak a awm lova, chuvangin inpekna tak tak nena thawk tur leh a la zir mekte pawh chhel taka zir turin a fuih bawk a ni.

MCON Principal Pi Lalduhsaki tarlan danin MCON hi kum 2005-a kalpui tan a nih atangin zirlai 528 an zirchhuak tawh a. Kumin atangin Mizorama a hmasa ber ni turin seat sawm awmna Master of Science (Nursing) an hawng a, nikum lamah pawh Post Basic B.Sc Nursing an lo hawng tawh bawk. Thawktu, Teaching Staff 21 leh Non-Teaching Staff 29 an awm mek a, tun session-ah hian zirlai 198 awmin, State pawn atangin PM Special Scholarship (PMSS) Scheme hnuaiah Jammu and Kashmir leh Ladakh atangin zirlai 7 an awm bawk a ni. Zirchhuak tawhte zingah mi 92 chuan sawrkar hna an zawm a, mi 265 te chu Contract leh Private Hospital-ah an thawk a. State pawna hnathawk mi 87 leh ram pawna hnathawk mi 70 an awm bawk a ni.

Vawiin 39th Graduation & Lamp Lighting Ceremony 2026-ah hian BSc. Nursing zirlai thar mi 33 lawmluh an ni a. B.Sc Nursing 2026 exam-a Year tina tithate hnenah ‘L.Chhawnkima Award’ hlan an ni a, B.Sc Nursing 1st - 8th Semester University exam-a Mizoram pumpuia Top- 3 rank holder-te hnena an hlan thin Academic Excellence Award chu PC Lalnuntluangi hnenah hlan a ni. MZU Exam 2026 result chhuak hnuhnung berah khan MCON zirlaiten Pahnihna, Palina leh Pasarihna dinhmun an hauh a. Zirlai 16 (za zela sawmnga) chu distinction-ah an pass bawk a ni.

Vawiin programme-ah hian MCON Principal Pi Lalduhsaki chuan College chungchang report a pe a, Civil Hospital Aizawl Nursing Superintendent Pi H Vanlalhluni chuan Lamp Lighting Ceremony a kaihruai a ni.