Nimin tlai lamkhan Health Minister Pu Lal Thanzara room-ah Mizorama Medical college, Mizoram Institute of Medical Education and Research (MIMER), din tum chungchang sawi ho a ni. Meeting ah hian Health Secretary, Pu Lalhmingthanga, Principal Director, H&FW Dr K. Ropari bakah senior officers te an tel a ni.

Health Minister chuan Medical College din chungchang hi a ngaih pawimawh thu leh ama ho ngeia a hmunhma te enfiah a duh thu sawiin MCI inspection an rawn neih huna medical college hi an pawmpui ngei theih nan a tul anga hma lak zui zel tur anih thu a sawi a. MCI dan in a phut leh phal ang zela thawktu lak belh leh a hmunhma te chei that kawngah pawh bawhzui zel in Medical College hi hawn a nih hunah hlawhtling taka a kal chhoh zel theih nan a tul anga thawh pui tur zawn thleng pawha hmalak tura ruahman a nih thu a sawi.

Meeting-ah hian Pi Jane Ralte in MIMER dinna tur chungchanga hmalakna te a report a,chumi hnu ah uluk takin Health Department hotu te chuan hmalak chhunzawm dan tur te leh a hlawhtlin ngei theihnan a tul ang te ngaihtuah in sawi ho nghal a ni.

MIMER hi State Referral Hospital, Falkawn ah din tum ni in, 25th November, 2015 khan Ministry of Health & Family Welfare, Govt. Of India official te’n a hmunah an rawn endik tawh a.30th November, 2015 khan Ministry of Health & Family Welfare te hian Delhi-ah Health Department aiawh te chu hearing nei turin an rawn ko a, hei hi an vawi khat hearing neihna a ni in tluang tak leh tha taka zuk neih a ni. Hearing-ah hian state hrang hranga medical college din tum te pawh koh an ni a, Medical Council of India (MCI) te hian an duh uluk em avangin vawi 2 vawi 3 koh tawh te pawh an awm ani.