July ni 16-a Dinthar, Tuikual, Kanan leh a chheh vel veng thenkhata beikang um eisual avanga damlo Civil Hospital-a enkawl chungchang Principal Director, Health & Family Welfare Department Dr. F. Lallianhlira hovin thlirlet a ni a, beikang um eisualna thleng fo thin pumpelh nana hmalak dan turte sawiho a ni.
He thilah hian Health Department hnuaia Integrated Diseases Surveillance Project (ISDP) thawktuten a tuk July ni 17 atangin bekang um eisual chungchang chhui zuiin chanchin leh sample lakkhawm thei ang ang an la khawm nghal a. An sample lak te hi test turin Civil Hospital, Microbiology Department leh RIPANS Laboratory ah te an pe nghal a ni.
Eisual avanga hriselna lamah harsatna tawh thin, a bik takin bekang um chungchang, chu meeting-ah hian zau takin sawiho a ni a. Rang taka hmalak dan leh enkawlna pek dan ruahmanna an sawiho a. Bekang umtuten an um dan chu chiang zawka zir nise; eisual avanga harsatna tawk (food poisoning) an awm palhin, zirchian (investigation) tih dan tur leh mithiam (doctor) rawn tur (contact person) dah te pawh rawt a ni.
Food & Drugs Section-in Bekang um tuten an bekang laknate an hriatpui leh an chhinchhiah chu thil tul leh pawimawh tak a ni thu sawilan a ni a, bekang um licensing chu kalpui dan zir nise tih rel a ni bawk a. Tam tham taka zawrhchhuah atana bekang um thinte chhinchhiah a tul thu leh thianghlim leh uluk taka ei tur sawngbawl a pawimawhzia te zirtir nise an ti a. Health Department chhuah chanchinbu ‘Hriselna’ ah mipuite hrilhhriat nise tih rel a ni bawk. Bekang hi Mizo chawhmeh lar pawl tak a nih angin eisual palh a thlenin Food Safety Section lamin buaipui thin se tiin an rel bawk a ni.
Hun hmasa lama bekang um eisual chungchanga sample test tawhah te hian chemical hlauhawm mihring taksa tan pawi thei tur ang chi hmuh a ni lova, pum natna thlen thei hrik, a bik takin E.coli bacteria, hmuh fo a ni thin a ni. A siam dan leh um dan thianghlim tawk lo thin hian hetiang thil hi a lo thlen thin a ni.
