No.6457/2020-2021

Vawiin khan SAD Conference Hall, MINECO-ah naupang COVID-19 negative, an nu/chhungte COVID-19 positive, in lama enkawltu nei lo te sawrkarin a lo enkawl lailawk dan tur ngaihtuah a ni a. Health Minister Dr. R. Lalthangliana'n he hun hi kaihhruaiin, MOT Chairman Dr. ZR Thiamsanga, MLA, Health Department leh Social Welfare Department bakah Indian Medical Association aiawhte an tel.

Vawiin meeting hian November ni 4, 2020-a hemi chungchang ngaihtuaha thutkhawm neih a a zirchiang tur Committee an din in rawtna an siamte an thlirho a. Ruahman dan chuan Bal Bhavan, ITI veng a mi chu hetiang dinhmun a ding naupangte enkawlna hmun atan siam a ni a, district tinah a remchan dan anga ruahmanna siam tum a ni. Heng hmuna naupang enkawlte hi quarantine ngai an nih vangin Quarantine Facility inkaihhruaina anga enkawl an ni ang a, reilote chhunga Child Care Institutions a awm anga chhiar tur niin, naupang a bika enkawl leh venhim ngai an nih vangin Juvenile Justice (Care and Protection of Children) Act, 2015 leh The Mizoram Juvenile Justice (Care and Protection of Children) Rules, 2019 hnuaia naupang enkawl dan anga enkawl tur an ni.

Heng hmuna naupang awm thei turte chu COVID-19 negative, an chhungte positive vek, in lama enkawltu nei lo emaw, naupang enkawltu ber COVID-19 positive vanga a awm loh hlana an chhungkua kha naupang tan a him tawk lo nia ngaihte an ni ang a, an dinhmun hi Local Level Task Force leh Health Department officialte bakah Social Welfare Department official ten an enfiah ang.

Enkawlna hmuna naupangte hi guidelines milin sample test sak thin an ni ang a, an ei leh in tur Women and Child Development Directorate in an ngaihtuah dawn a ni. Naupangte awmchilha enkawl turin Social Workers' volunteer-te hman an ni ang a, naupangte hi uluk taka vilin counselling pek thin an ni dawn a, nitin an awm dan tur programme tha taka ruahman a ni dawn bawk a ni.

Naupang kum tlinglo, rilru leh pianphunga rualbanlo mahni a inenkawl theilo, COVID-19 negative ni si, symptom nei lo, nu leh pa emaw guardian (lo enkawltu bik neite) positive in an awmpui ngai si te chu BSUP, Durtlang CCC ah dah tura ruahman a ni bawk.

Vawiin meeting ah hian nu COVID-19 positive in Children-friendly Covid Care Centre a naupang an hruailuh theih tur chin, Children-friendly Covid Care Centre a an luh hma a an tih tur te, an luh hnu a an zawm tur te leh thil pawimawh dang chi hrang hrang sawiho a ni a. Reilote ah sawrkarin thupek chhuahin heng ruahmanna te hi kalpui a ni ang.