No.4822/2020-2021
Chief Minister Pu Zoramthanga thahnemngaihna avangin Aizawl tih loh District 10 ah TrueNAT Laboratory din tura hmalak a ni a. Chief Minister’s Relief Fund atangin TrueNAT Quattro khawl leh a mamawh hmanraw dangte lei tura ruahmanna siam niin, heng zingah hian biological samples –DNA, RNA, Proteins, Cell extract te, bakah COVID-19 sample positive te hun rei tak vawn thatna tur Ultra Low Temperature Deep Freezer a tel a ni.
Indian Council of Medical Research (ICMR) in June ni 25, 2020 a guidelines thar a tihchhuahah sample dah that nan -80 degree centigrade ultra low temperature deep freezer hman tur a ti a. Hetiang deep freezer hi chi hrang hrang awmin a tha pangngai hi cheng nuai 4 atanga nuai 8 inkar vel an ni hlawm a. Committee on Utilisation of Chief Minister’s Relief Fund for COVID-19 chuan heng deep freezer chi hrang hrangte hi buk tawnin July ni 17, 2020 khan YORKO Sales Mfg. Co. siam -80 degree centigrade ultra low temperature deep freezer Model : YSI-273EX chu a thlang a, pakhat hi Rs. 4,30,000/- man niin 7 lei tura thutlukna siam a ni.
-80 degree centigrade ultra low temperature deep freezer lei tharte hi Siaha, Champhai, Serchhip, Lawngtlai, Mamit, Khawzawl leh Hnahthialah dah an ni ang. Lunglei, Kolasib leh Saitual hian an lo neih tawh sa avangin telh an nilo.
Lockdown vanga rokhawlhna a awm thin avangin duh angin a rawn thleng hma thei lova, he deep freezer hian gas a hman reng a ngaih avangin thlawhtheihnaa phurh a rem lova, tunah hian kawngah rawn thang mekin tun kar chhung hian Mizoram a lo thlen beisei a ni. A supply tu hi M/S Stevenson’s, Tuikhuahtlang a ni.
