No.5135/2020-2021 

 Tunhnaia social media leh media platform hrang hrangah Mizoram Sawrkarin COVID-19 sample test fee to uchuak takin a la niin thu thehdarh a ni a, hemi chungchangah hian mipuiten thudik an hriat a tul avangin Health & Family Welfare department chuan thuchhuah a siam a, an thuchhuah ah  April ni 7, 2020 atanga September ni 15, 2020 thleng khan Mizoram chhungah sawrkar hmalakna in sample 52, 565 test a nih thu an tarlang.

Health & Family Welfare thuchhuaha a lan danin Zoram Medical College (ZMC) laboratory-ah April ni 7, 2020 atang khan RT-PCR khawl hmangin chhumlo chat lovin nitin sample test hi kalpui a ni a. Mizoram sorkarin RT-PCR khawl 3 a neih hnu phei chuan chak lehzualin test hi kalpui a ni. RT-PCR tlukpui tho TrueNAT test pawh Lungleiah June ni 12, 2020 atangin kalpui tan a ni a, District tinah TrueNAT khawl bun fel tawh niin tunah hian test kalpui tan mek a ni bawk. Rapid Antigen Test pawh August ni 6, 2020 atangin kalpui tan a ni. 

Mizoram chhunga April ni 7, 2020 atanga September ni 15, 2020 (nimin) thlenga sample test tawh zat chu a hnuaia tarlan ang hi a ni :

 Sample test hi a thlawn vekin rei tak kalpui a ni a. Sample test a thlawn veka kalpui a hautak zia hre chungin Sawrkar chuan Mizoram mipuite kan himna tur a ngai pawimawh si a, Sawrkar chuan a thlawn veka test a hautak em avangin Indian Council of Medical Research (ICMR) criteria in a huamloh – mahni mimal duhthu leh mamawhna avanga in test duh te leh mahni/mimal sumdawnna leh hna tul avanga Mizoram pawna zin chhuak lo lut lehte, business leh tulna dang avanga Mizoram rawn lut Central PSU, Private Agency, Central Armed Paramilitary Forces (CAPF) hnuaia thawkte thlenga vantlang sum senga a thlawna test vek hi a hautakin Mizoram mipuite lakah pawh a inthlahrunawm a, mahni hna leh sumdawnna thila zin veivak, sum lama harsatna nei lemlo te hi chuan COVID-19 test nana senso engemawzat hi chu pe ve tawh se tih rawtna chu State sawrkarin pawmin  Notification No. D.33011/22/2020-HFW/(nCOV) chu July ni 30, 2020 khan a tichhuak a, hei hi August ni 24, 2020 khan siam that leh a ni. He notification in a tarlan dan chuan COVID-19 sample test hi category hrang hrangah then niin, a tam zawk chu a thlawnin test chhunzawm tur a ni a. Category tlem zingah test man lak ve tawh ni se tih a ni.

Test man lakloh (FREE) te chu - ICMR guidelines in test ngai a tih zawng zawngte - COVID-19 donaa a hmatawngte (Frontline Workers), contact tracing atanga test ngai zawng zawngte, COVID-19 hri kai enkawl mekte chu a thlawna test vek tur an nih angin hengte hi a thlawn veka test an ni a. Hemi avang hian tun thlengin COVID-19 test tam ber chu a thlawn (free) a tihsak a ni.

Test man (fee) chawi tura tihte chu -  August ni 1, 2020 hnua Mizoram pawn atanga Mizorama lo lut Quarantine centre-a awmte, Hotel leh mahni ina in quarantine te chuan subsidised rate (RTPCR – Rs. 2500, TrueNAT – Rs.1500) an chawi ang tih a ni. August ni 1, 2020 hmaa lo lutte a huam telloh avangin migrant workers (Mizoram pawna inhlawhfa lo kir lehte) zinga a tam zawk chu he order hian a huam lo a ni. 

Order in Test fee chawi tura a tihte zingah sum lama harsatna neite - BPL card holder leh LLTF/VLTF ten test man pe lo tura an dilpuite bakah BPL card holder ni lo, mi harsate pawh a thlawna test an ni.

Mi tlemte – mahni duh thu liau liaua test duh leh engemaw avanga certificate mamawhte chauhin a man to zawk (RTPCR - Rs 4500, TrueNAT - Rs 3000) chawiin an test thei ang tih a ni. Hengte hi ICMR guidelines in a huamloh, test mamawh tlat si te an ni a. An tana test theihna turin remchanna Sawrkarin a siam sak zawk a ni.

Rapid Antigen Test hi chu tun thlengin a ‘free’ a test hi kalpui a ni.

RT-PCR test tur hian a bawlhlo chi hrang hrang 36 lai a ngai a, hengah hian sorkar chuan sum tam tak a senso a ngai thin a. Hetianga sum seng thei nia hriatte’n test man an lo chawi ve hian tlem azawng chu a phuhruk ve lek dawn chauh a ni. 

Tun dinhmunah mi 52,565 test tawh atang hian test man chawi chu mi za zelah 1 (1%) vel awrh chauh an la ni a, hei hi Sawrkar thatzia tilangtu a ni.

Sawrkar chuan Mizoram chhunga private hospital / private laboratory te hian COVID-19 testing (TrueNAT leh Rapid Antigen Test) hi kalpui ve tawh se a ti a, hemi atana thil tul hmasa The Mizoram Epidemic Diseases (Covid-19) Regulations, 2020 siam danglam (amend) tur pawh thui tak kalpui tawh niin, reiloteah tihfel beisei a ni.